И йикъара чна Дербентдин ракьун рекьерин колледжда кьиле фейи Дагъустандин медениятдинни чIаларин мярекатда иштиракна ва бине Мегьарамдхуьруьн райондин Советский хуьряй тир и колледждин сад лагьай дережадин муаллим Римиева Эмина Ниязовнадихъ галаз таниш хьана.
Эмина Римиева 1984-йисуз «Бахт» ансамблдин кьил ва тамада хьайи Ниязан хизанда дидедиз хьана. Ада 2001-йисуз Советский хуьруьн юкьван мектеб акьалтIарна. Гьеле мектебда кIелзамаз, ада гележегдин пеше хкянавай. 2002-йисуз ам Дербентдин педколледждик экечIна, 2005-йисуз ам яру дипломдалди куьтягьна.
Хуьруьз хтана, кIвалахдай чкадихъ къекъвена. Амма вичин пешедай кIвалах жагъанач. Мажбур хьана карчийрин къурулушра гьар жуьре кIвалахар авуниз. Ада хуьре сифтегьан классра кIелзавай аялриз ва ингилис чIал чирзавайбуруз репетиторвал ийиз гатIунна. И рекье агалкьунар хьайи Эминадал хуьруьнбуру чпин аялар ихтибарна. ИкI ада саки цIуд йисуз зегьмет чIугуна. 2015-йисуз хуьруьн аялрин бахчада зур штат ачух хьайила, ам аялрин «Ласточка» бахчада тербиячивиле кьабулна. КIвалахдив рикI гваз эгечIзавай пешекар бахчадин заведующийди музыкадин рекьяй алава образование къачун патал «Каспий» тIвар алай академиядиз ракъурна. Ругуд вацра чирвилер хкажна, музыкадин хиле кIвалахдай диплом гваз хтайла, адав музыкадин руководителдин сятер вугана. Хиве авай везифаяр гьакъисагъвилелди тамамарзавай Эмина Ниязовна гуьгъуьнлай методиствиле эцигна.
2019-йисуз, кIвалахдивай къерех тахьана, ам Дагъустандин госпедуниверситетдин къецепатан чIаларин факультетдик экечIна. Вад йисуз кIелзавай анаг ада, экзаменар вахкана, пуд йисуз кIелна акьалтIарна.
2019-йисуз Президент В.В. Путина Федеральный Собранидиз ракъурай чарче 2020-йисалай «хуьруьн муаллим» федеральный программа кардик кутунин теклиф ганай. Э. Римиевади 2020-йисуз вичин документар гьазурна, РД-дин образованидин ва илимдин министерстводиз рекье туна.
Пешекарар бес тежезвай хуьрериз ракъурзавай и программадин сергьятра аваз, хъсанбурун арадай хъсанбур хкягъун патал конкурс тухузвай. Федеральный программадик экечIун патал конкурсда 65-далай тIимил тушиз баллар къачуна кIанзавай. Эмина Ниязовнади 86 балл къазанмишна.
Ада и кар икI рикIел хкизва: «Заз зи уьмуьрдин юлдашди лагьана: «Мектебда кIвалахнавай са йисан стажни авачиз, 15-20 йис педагогвилин стаж авайбурун арада конкурсда иштиракун акьалтIай акьулсузвал я». Зунни кьве рикIин хьанвай, фидани, фидачни лугьуз. Ана хьайиди жеда лагьана, за фидай къарар кьабулна — фейи зун гъалибвал къазанмишнавайбурун жергедик акатна. Конкурсдилай гуьгъуьниз чаз пешекарар бес тежезвай районрин хуьрер къалурна, гьиниз физ кIанзаватIа, хкягъа лагьана. ГьакI лагьанатIани, заз Хасавюрт райондиз фин теклифна, чи патан районрани пешекаррихъ игьтияж аваз. За комиссиядин членриз лагьанай: «Зи лезги хуьр, гьи райондинди кIандатIани хьурай, ингилис муаллим авачиз тадач, зун са лезги хуьруьз ракъура». Чи насигьатчийриз и гафар ван хьайила, «Ваз баркалла! Вун халис ватанперес я» лагьана».
«Хуьруьн муаллим» программадай ам Докъузпара райондин Къалажухрин хуьруьн юкьван мектебдиз ракъурна.
Гуьзел дагълар, михьи гьава, ачух рикI авай къалажухвияр адаз пара хуш хьана. Мектебдин коллективди цIийиз атанвай пешекар хушвилелди кьабулна. Адаз кIвалахдай ва яшамиш жедай вири шартIар тешкилна. Пешекарди хуьруьн аялриз ингилис чIал чириз, вири къуватар эцигна.
Ада тарсара гьар жуьредин къайдаяр ишлемишна. Ам образованидин «Учи.ру» онлайн-платформадин активлу иштиракчи я. И платформадал гьар жуьре рекьерай кьиле фейи тарсара ам агалкьун къазанмишнавай 12 сертификатдиз лайихлу хьана. Вичин чирвилер хкажиз, кIвалахдив яратмишунардай тегьерда эгечIуни, тарсар итижлудаказ тухуни аялар предмет кIан хьунал ва чирвилер хкажунал гъана.
Мектебдихъ галаз кутIуннавай икьрар куьтягь хьана хкведайла, Э.З. Шихвердиеван тIварцIихъ галай Къалажухрин мектебдин директор Вадир Гуьлнезерова адаз ихьтин характеристика гана: «Мектебда кIвалахай йисара ада вич методика хъсандиз чидай муаллим яз къалурна. Тарсара дидактикадин материалар, схемаяр, плакатар ва информациядин технологияр ишлемишиз, аялрин чирвилер хъсан дережадиз хкажна. И йисара ада аялриз чирвилер ва тербия гунин са кьадар тежриба кIватIна. Ам муаллимвилин зегьметдиз вафалу я. Вилик эцигнавай мурадар, чирвилер гунин гьерекат тамамвилихъ агакьарун патал ада вичел гзаф кIвалахзава. Инсанрив акахьдай къилихрин, чинал хъвер алай Эмина Ниязовнади мектебда кьиле фейи вири мярекатра активнидаказ иштиракна».
Дербентдин ракьун рекьерин колледждин завуч Эмилия Тахмезовадиз институтда вичи тарсар гайи, пешедин рекьяй хъсан чирвилер авай студент, икьрар куьтягь хьана, шегьердиз хквезвайди чир хьайила, адахъ галаз алакъадиз экъечIна ва колледждиз кIвалахал атун теклифна.
КIелунин цIийи йисалай рабочий пешекарар гьазурзавай колледжда кIвалахал акъвазнавай Эмина Ниязовнади студентриз хъсан чирвилерни тербия гудайдахъ чун инанмиш я.
Къагьриман Ибрагьимов
