Михьивал сагъламвилин замин я. Гьар са рекьяй виликди физвай, хъсан крарик кьил кутазвай СтIал Сулейманан районда михьивилер хуьник «Касумкентсервис» ООО-ди еке пай кутазва. Адан коллективди план-графикдин бинедаллаз хуьрера яшайишдин кIеви амукьаяр (ТКО) кIватI хъийизва ва махсус полигондал тухузва.
Гьелбетда, хиве авай везифаяр кьилиз акъудун патал ООО-диз бес кьадар пешекаррихъ галаз санал махсус техникани лазим я. И жигьетдай «Касумкентсервис» карханадиз райондин жумарт инсанри, мергьяматлувилин фондари ва карханайрини чпелай алакьдай куьмекар гузва. Хайи райондихъ рикI кузвай ихьтин ксарикай яз, чавай РД-дин Халкьдин Собранидин депутат Имам Яралиеван, Салман Бабаеван, Фируза Керимовадин, Назим Ханбалаеван, Мергьяматлувилин «Умуд» фондунин, «Полоса» агрохолдингдин ва масабурун тIварар кьаз жеда. Абуру гьам пулунин такьатралди, гьамни махсус техника гуналди «Касумкентсервис» ООО-диз гзаф куьмекар гузва, идалди абуру районда михьивилинни сагъламвилин гьалар хъсанаруник лайихлу пай кутазва.
«Касумкентсервис» ООО-дин директор Гъалиб Фатагьова чаз лагьайвал, карханадиз мукьвара «АлиЯк» ООО-дини чпин патай зирзибил тухудай «КамАЗ» машин гана.
Агрохолдингдин генеральный директор Вячеслав Калюка и йикъара шад гьалара ООО-дин директор Гъалиб Фатагьовав машиндин куьлегар вахкана (шикилда).
«Касумкентсервис» ООО-дин коллективди чпиз куьмек гузвай вирибуруз сагърай лугьузва. Умудлу я, ихьтин куьмекдалди абурувай кIвалах мадни хъсанариз жеда.
Хазран Кьасумов
