Яшайишдинни экономикадин рекьяй Дагъустандихъ хьанвай агалкьунрикай и йикъара республикадин экономикадин ва мулкар виликди тухунин министр Гьажи Султанова РД-дин Гьукуматдин Председатель Абдулмуслим Абдулмуслимоваз ихтилатна. 9 вацран делилралди, гьалар хъсанвилихъ финин рекье са шумуд хиляй еришар йигин хьанва: хуьруьн майишатдин суьрсет — 101,8 %, эцигунрин хиляй кьилиз акъуднавай кIвалахар — 102,2 %, яшайишдин кIвалер ишлемишиз вахкун — 42,8 %, метягьар кура-кура маса гунин савдадин оборот — 101,1 %, халкьдиз гьакъидихъ ийизвай къуллугърин кьадар — 102,4 %.
Министрдин гафаралди, алай йисан сад лагьай паюна экономикадин рекьяй 52 уьлкведихъ галаз алакъалувилелди кIвалахар кьилиз акъудна. Алай йисуз экономикадинни яшайишдин жигьетдай республикадин гьалар вири хилера хъсанбур яз амукьун вилив хуьзва.
ТIвар кьунвай министерстводи гележегда «РД-дин дагълух мулкар яшайишдинни экономикадин рекьяй еримлу авун» госпрограмма кьилиз акъудун патал 75 млн манатдин такьатар фикирда кьунва.
«Лезги газет»
