Ам, Сафаров Ражаб, Куьре округдин Куквазрин хуьре дидедиз хьана. Манийрални макьамрал рикI алай гадади ирид йисан школадилай гуьгъуьниз Бакуда медицинадин училище куьтягьна. Гуьгьуьллувилелди дяведиз фейи Р. Сафарова женгера иштиракна. Крымда Сапун-дагъдал хьайи ягъунра къалурай дирибашвиляй адаз Яру Пайдах орден гана. Дяведай ам инвалид яз хтана.
Р. Сафарова гьевескар артистрин десте тешкилна. Машгьур шаиррин чIаларихъ галаз санал ада вичин теснифарни, чIагъанни ягъиз, тамамардай. Лезги халкьдин арада ам манидар, чIагъанчи, композитор, шаир, артист — ашукь Ражаб хьиз машгьур хьана. Ада тамамариз хьайи Е. Эминан «Туькезбан», Х. Тагьиран «Гьуьруьдин тариф», вичин «Акьах, гуьзел, вун балкIандал» ва маса манияр яшлу ксарин рикIел гилани алама.
Ашукь Ражаб Сафарован рехъ адан рухвайри давамарзава. 2014-йисуз Усугъчайдал кьиле фейи ашукь Ражабан тIвар алай милли манийрин фестиваль чи культурадин уьмуьрда рикIел аламукьдай вакъиадиз элкъвенай.
Къ. Акимован «Лезги литература» энциклопедиядай.
«Лезги газетдин» 2025-йисан 41-нумрадай.
