Мукьвара Къизляр шегьерда «Кавказдин къуват» лишандик кваз залан атлетикадай международный дережадин сад лагьай фестиваль кьиле фена. Шегьердин кьилин стадиондал тешкилай акъажунра Россиядай, Къазахстандай, Белоруссиядай виридалайни хъсан спортсменри иштиракна.
Акъажунриз килигиз 3000-дав агакьна тамашачияр атанвай. Стадиондал Дагъустандин халкьарин яратмишунриз, сеняткарвилериз талукьарнавай милли майданарни кардик кутунвай. Жуьреба-жуьре пешейрин сагьибри ашкъи авай гьар садаз кIарасдал нехишар атIуз, хъенчIин къапар гьазуриз, гам храз ва маса сенятрин сирер чирзавай.
Фестиваль РФ-дин къуватдин экстримдин Федерациядин, РД-дин физический культурадинни спортдин министерстводин, Къизляр шегьердин администрациядин куьмекдалди Къизлярдин коньякар акъудзавай заводди тешкилнавай. Мярекатдиз атанвай гьуьрметлу мугьманрин арада шегьердин мэр Александр Шувалов, заводдин директор Евгений Дружинин, винидихъ тIвар кьур министерстводин регьбердин заместитель Марат Ибрагьимов, залан атлетикадай муьжуьд сеферда Россиядин чемпион Михаил Кокляев ва масабур авай.
Фестивалдин сергьятра аваз, акъажунар спортдин са шумуд жуьредай тешкилнавай: армрестлингдай, путар хкажунай, цIил ялунай, къванер гадарунай ва икI мад. Шад жедай кар ам я хьи, СтIал Сулейманан райондай тир спортсменри путар хкажунай фестивалда чпелай викIегьбур авачирди тестикьарна. Машгьур тренер Магелан Саидован гъилик вердишвилер къачузвай Эдик Агьмедова жуьреба-жуьре заланвал авай путар хкажунай кьве категориядай 1-чкаяр кьуна. Са гъили 50 килограмм къвезвай пут хкажунай Азим Абакаров 3-чкадиз лайихлу хьана. Ам гьакIни мад са категориядай кишпирдин медалдиз лайихлу хьана. Мад са ватанэгьлиди — Сарат Мирзоева — путар хкажунай 2-чка кьуна.
Акъажунрин нетижада командайрин арада 1-чка — Дагъустандин, 2-чка — Къазахстандин ва 3-чка Белоруссиядин командайри кьуна. Гъалибчийрив кубокар, медалар ва савкьатар вахкана.
Чи мухбир
