Дяведин махсус серенжемда иштиракзавай Россиядин Яракьлу Къуватрин частарик акатзавай вири кьушунри Верховный Главнокомандующийдин буйругъар лазим тирвал кьилиз акъудзава. Алай вахтунда абуру Красноармейск ва мадни са шумуд чка элкъуьрна кьунва. Душмандихъ галаз игитвилелди женг чIугвазвай офицерриз, аскерриз вири регионрин агьалийри, гьа гьисабдай яз дагъустанвийрини куьмек гузва.
Россиядин халкьдин садвилин йикъан суварин вилик Дагъларин уьлкведай Донбассдин районриз жуьреба-жуьре шейэр, алатар, суьрсет авай са шумуд автомашин рекье гьатна.
Лугьун лазим я хьи, республикадин жемиятдин «Дидейрин къуват» тешкилатдик квай дишегьлийри Ватандин итижар хуьзвай аскерриз мукьвал-мукьвал куьмекдин гъил яргъи ийизва, гьатта аскеррин тIалабунарни кьилиз акъудзава, абуруз сифте нубатда герекзавай шейэр рекье твазва.
Луганскдин ва Донецкдин республикайриз, Белгороддин областдиз ракъурнавай куьмек газдин плитайрикай, газдин баллонрикай, яргъанрикай, кIвалин консервийрикай, суьрсетдикай, женгера, яшайишда герек къвезвай алатрикай ва маса шейэрикай ибарат тир. Улакьралди талукь идарайри таъминарзава.
«Дидейрин къуват» тешкилатди дяведин махсус серенжемда иштиракзавайбуруз куьмекар гуз пуд лагьай йис я. И вахтунда Донбасс патал женг чIугвазвайбуруз са шумуд виш тонн пар тухванва. Мергьяматлувилин и важиблу карда активвилелди иштиракзавайбурун чIехи пай махсус серенжемда телеф хьайи ва исятда ана миллетбазрихъ галаз викIегьвилелди женг чIугвазвай рухвайрин дидеяр, уьмуьрдин юлдашар ва вахар я.
* * *
28-октябрдиз Дагъустандай Запорожьедиз мергьяматлувилин нубатдин пар рекье туна. «Вири санал ала» фондунин регьбер Селимхан Мирзеханован гафаралди, 35 тонндикай ибарат суьрсетдик алукIдай парталар, транспортдин, алакъадин ва маса шейэрин наборар квай. И куьмек тешкилайбур «Вири санал ала» фондни Къизилюрт щегьердай тир Ашахан Хазанатован хизан я. Къейд авун лазим я хьи, Хазанатован хизанди дяведин махсус серенжемда авайбуруз герек шейэр 12 сеферда рекье туна. Ихьтин ксар республикада мадни ава.
Абад Азадов
