Дагъустан Республикадин Кьил Сергей Меликов и йи­къа­ра­ Вирироссиядин женгерин ва ватанпересвилин «Зарница 2.0» къугъуна гъалибвилер къазанмишай ко­мандайрихъ галаз гуьруьш­миш хьана. КьетIендиз къейд авун лазим я хьи, аялрин и къугъун неинки ватанпересвилин тербия гудай, гьакI абурун сагъламвал­ мягькемардай, гележегда герек къведай пешейрай, яша­йишдин месэлайрай чирвилер, вердишвилер гудай хъсан серенжемни я.

РикIел хкиз кIанзава хьи, шаз къугъуна 7 йисалай 17 йисал къведалди яшара авайбурун дес­тейри иштиракнай. «Зарницадин»­  чи ко­мандайри Кеферпатан Кавказдин федеральный округдин ва Волгоградда кьиле фейи федеральный дережадин акъажунра иштиракдай ихтияр къазанмишнай ва анра кIвенкIвечи чкаяр кьунай.

ЦIи «Зарница»  къугъуна рес­публикадин саки вири шегьеррай ва районрай 80 агъзурдав агакьна аялри ва гьакI 18 йисалай алатнавай, училищейра, колледжра кIелзавай же­гьилрини иштиракна. Аялри са шумуд паюна тешкилай­ къугъунра жергеда аваз финай, манияр лугьунай, тарихдин «Форма алай игитар» темадин викторинадиз жавабар гунай, спортдин жуьрейрай, хер-кьацI хьайидаз сифте­гьан куьмек гунай, манийви­лерин зул ахтармишунай, радиациядин, химиядин, био — эсердикай хуьнин, Россиядин государст­водин ва военный тарихдин рекьяй чпиз авай чирвилерай алакьунар къалурна.

Республикадин регьбердин пресс-къул­лугъди хабар гайивал, Ставрополда кьиле фейи округдин паюна Кеферпатан Кавказдин федеральный округдай 200 касди иштиракна. Абуру тактикадин медицинадай, женгинин ва инженервилин рекьяй гьазурвиляй, беспилотникар идара авунай, лап четин шартIара гьатайла, кьил акъудиз алакьунай ва тактикадин къугъунрай чпихъ авай чирвилер, вердишвилер раижна.

Дагъустандай Ставрополдиз республикадин акъажунра сад лагьай чкаяр кьур Къизляр шегьердин ва райондин командаяр фенвай. Абуру гьанани викIегьвал ва чпихъ вири хилерай хъсан вердишвилер авайди успатна, сад лагьай ва приздин чкаяр кьуна. Сергей Меликова аялриз агалкьунар теб­рикна.

Гуьруьшдиз гьакI физкультурадин «Вызов первых» проект­дин гъалибчийризни тек­лифнавай. Ана набутвал авай 6 йисалай 12 йисал къведалди яшарин аялри иштиракна. Красноярскда кьиле фейи Вирироссиядин  финалдиз 280 кас акъатна. Избербаш шегьердин кьве командади сад лагьай чкаяр кьуна. Сергей Меликова абурни тебрикна.

Абад  Азадов