И йикъара чав полициядин отставкада авай генерал-майор, баркаллу къурушви Шамил Загьрабович Асланов рагьметдиз фена лагьай чIуру хабар агакьна.
Шамил Асланов 1941-йисуз Докъузпара райондин Къурушрин хуьре дидедиз хьана. Адан буба Загьраб Асланов Ватандин ЧIехи дяведин иштиракчи тир. Еке хизанда чIехи хьайи Шамилаз зегьмет чIугун вуч кар ятIа аялзамаз чир хьана. Дагъустандин механический техникум акьалтIарайдалай кьулухъ ам «Дагдизель» заводда кIвалахал акъвазна. Аскервилин къуллугъ кьилиз акъудна хтай жегьил офицерди 1972-йисуз гележегдин вичин кIвалах къанун-къайда хуьдай органрихъ галаз алакъалу авуна. Гуьгъуьнлай ам чирвилер къачун патал СССР-дин МВД-дин академиядиз рекье туна. Криминалиствилинни юрист-правоведвилин пешеяр чирайдалай кьулухъ Дагъустанда ада къайдаяр хуьдай органра къуллугъ давамарна.
Къуллугъдин вахтунда къалурай кьегьалвилериз, алакьунриз, регьбервал гунин ерийриз килигна, баркаллу ватанэгьли генерал-майорвилин чиндиз лайихлу хьана.
Отставкадиз фейидалай кьулухъ ада 1998-йисалай хейлин йисара Махачкъаладин администрацияда административно-правовой управленидиз регьбервал гана.
Шамил Загьрабович 1999-йисуз Махачкъаладин ополченидин кьиле акъвазна ва и йисан зулуз Ботлихдиз кьван фена, ана Хаттабанни Басаеван кIеретIриз ягъунар кьуна. Бандитрин гъилибанри гьужумайла, Дагъустанда лап четин гьалар арадал атанвай. Женгерин вахтунда Ш.Асланов кьиле авай интербригададин ополченцийрикай садни хкат тавун кьетIен кьегьалвал хьана.
Уьмуьрдин эхирдалди ада Ватандиз къуллугъна, акьалтзавай несилриз ватанпересвилин хъсан чешне къалурна.
Рагьметлудан хизанриз, мукьва-кьилийриз чна башсагълугъвал гузва. Машгьур ватанэгьли Шамил Загьрабович чи рикIера амукьда.
Медениятдин «Къуруш» центрадин векилар
