Алатай гьафтеда Махачкъалада Вирироссиядин жемиятдин «Гордость нации — 2025» пишкешдин регионрин арада тухвай конкурсдин гъалибчийрив шабагьар вахкуниз талукьарнавай мярекат кьиле фена. Ам РД-дин Гьукуматдин Председателдин заместитель Рамазан Жафарова ачухна.
Вице-премьерди вичин рахунра къейд авурвал, ихьтин дережадин мярекат Дагъустанда тешкилун республика патал важиблу кар хьиз кьабулиз жеда. Адахъ чи чIехи уьлкведин халкьарин арада дуствал, стхавал мягькемарунин жигьетдай еке метлеб ава.
Гуьгъуьнлай рахай «Ассамблея народов России» тешкилатдин генеральный директор Александр Дарковича иштиракчияр тешкилатдин Советдин председатель Владимир Васильеван тIварцIихъай тебрикна ва Кеферпатан Кавказдин регионрай гъалиб хьайибуруз агалкьунар мубаракна.
Дагъустанвийрикай федеральный дережадин пишкешдиз жуьреба-жуьре номинацийрай са шумуд кас лайихлу хьана. Абурун арада Махачкъаладин 5-нумрадин лицейдин муаллим Раисат Османова, авар чIалал акъатзавай «Гьакъикъат» газетдин векил Кавсарат Сулейманова, «Братство» НКО-дин кьил Исмаил Исрапилов, «Активный гражданин» НКО-дин векил Мегьамедали Мегьамедалиев, дарги чIалал акъатзавай «Замана» газетдин кьилин редактор Абдурагьман Исмаилов ва масабур ава.
Мярекатдин эхирдай винидихъ тIвар кьур Ассамблеядин Дагъустанда авай отделенидин председатель Зикрула Ильясова пишкешриз лайихлу хьайибуруз гъалибвилер мубаракна ва Россиядин жемиятдин кьилин пишкешдиз талукьарнавай конкурсар уьлкведин амай регионрани тухванвайди къейдна.
Чи мухбир
