Кьуд пад тушни женнетдин багъ!..
Дагъустандин Огни шегьерда яшамиш жезвай Мавлуд Мавлудован яшар 80 йисалай алатнава. Са девирда хуьре муьжуьд лагьай класс куьтягьай ам иниз чIехи стхадин патав атанай. Нянин школада кIелни хъийиз, шуьшеярдай заводда кIвалахал акъвазна. 1961-1994-йисара ада ина зегьмет чIугуна.
Сифте шиирарни заводда кIвалахзавай чкадал атанай. Ада рикIел хкизвайвал, садлагьана вилерикай къариб хьанвай хайи Рухунрин хуьр карагнай. Ам перишан гьиссер кьуна, абуру «Рухунрин хуьр» шиирни арадал гъана… Вичи кхьей шиирар ва гзаф кьадарда халкьдин манияр Мавлуд Мавлудован рикIел алама. ТIалабайла, ада абур гьасятда хуралай кIелда.
Уьмуьрдин юлдаш Жагьанхалум, Мавлуда вичи хкяна гъайи, са классда кIелай руш тир. Жагьанхалумани шиирар кхьизва. Ашкъи атайла, къаридини къужади чпин яратмишунар сада-садаз кIелда.
Бикеханум Алибегова
______________________________
Рухунрин хуьруьз
Эй зи азиз Рухунрин хуьр,
Истанбулдиз ухшар авай!
Азиз мискIин юкьвал алаз,
Шалбуз дагъдин къаншардавай.
Ватанэгьли тир жемятар,
КватIал хъжен чун Рухуниз.
Экуьн кьиляй азандин ван
Атурай ман чин япариз.
Гьам булах я, гьамни яйлах,
Мални-къара хуьз жезавай.
Кьуд пад тушни женнетдин багъ
Гьа чуьл туна, чун фенавай.
Рухунрин хуьр тир чIехиди
Кавха, фекьи, муаллим аваз.
Дуьнья тирвал чкIана халкь,
Бубад сурар хуьре амаз.
Гуьрар бахча, ИикӀрагъан тӀул,
Бахчайрихъни къуьл жедай бул.
Ягъва авай чуьхверрикай
Гьар са кӀвале мед жедай бул.
Тамар-тарар дарих я къе,
Рахадай кас амач лугьуз.
Вучиз чна гадарнава
Бубад ватан, кӀамач лугьуз?
Кардик кутан хъийин чна
Школани клубар къе,
Кьуд патахъди ван ацалтна,
Илим чиррай балайри къе.
Кьуд патахъди я къалмакъал,
Гъурбатдикай жедач ватан.
КIватӀал хъжен вири санал,
Ийин меслят, азиз дустар.
Самур вацӀ
Рагъулвилиз килигмир куьн,
Ава адахъ къуват гзаф.
Гьар са кӀвале емиш, техил —
Цивай тушни Самур вацӀун.
Чи магьалдай физвай къанав
Самур вацӀун са хел я гьа,
Цаз памидур, чи халкьари
Урусатда алверзава.
Гьуьляй атай къизил балугъ,
Ви дегьнеда сирнавзава.
Лезгистандин хуьрера вал,
Самурдин вацӀ, дамахзава.
Къавумдиз
Эй заз авай тек са къавум,
Вучиз яргъа къвазнава вун?
Сифте акурла, хуш тир ваз,
Гила вучиз пашман я вун?
На тарифдал зи хциз гайи руш
Агъу квай илан хьана хьи.
Йикъа пудра къакъра ягъиз,
Демекдавай верч хьана хьи.
Хци къачур вацран мажиб,
Дарман-духи бес жедачир.
Къуншидин руш акурла гъенел,
Адан кьилел чӀар тадачир.
Экуьнахъ зун цуриз фейла,
БалкӀандихъ тум галамачир.
Тумуникай кьилин гунг авуна,
Межлисарин юкьва жедир.
Чир хьанайтӀа заз акьван кӀвалах,
Гъидачир за ви руш, валлагь.
Зунжурдавай кицӀин къвалахъ,
Гьадаз ухшар шей хьана хьи.
* * *
3ун винелди килигайла,
Дагъдин кьилел циф акьалтна.
ЭрчӀи камар вилик вегьез,
Зи вилик са руш акъатна.
Хабар кьуна за рушавай:
— Вуч кас я вун инал алай?
Гъил зав гице, азиз суна,
Ширин суьгьбет ийин чна.
— Садлагьана жери кар туш,
Авазва захъ диде-буба.
Атайла куь бажи кӀвализ,
Жеда гьана суьгьбет ширин.
— Ви дидедиз аш ая лагь,
Кьашкьа гьерен къара алаз.
Няниз кӀвализ бажи къведа,
Гъилел са къат партал алаз.
Халкьдин манийриз ухшар яз
Дагъдин ценцив живед маргъал,
Вун яд хьана гьуьлуьз атуй.
Шагьабасан Гуьлизар руш,
Вун, лиф хьана, кӀвализ атуй.
* * *
Кьакьан дагъда чиг кими туш,
Ракъинин нур ават тийиз.
Зи вилелай нагъв кими туш,
За вуч ийин, факъир Саяд?
* * *
Бес на къачур гатун хали
Завай зулалд хуьз жедани?
Кагъаз кьванни кхьин тийиз,
Кай рикӀивай эх жедани?
* * *
Кьадар-кьисмет Аллагьдивай,
Гъил гице кван, чан кӀани яр.
Къведай вацран цӀувадрилай
Мехъерар я, чан кӀани яр.
* * *
ИстикӀандин кӀан къизил я,
Вуна адан къимет ая.
Вахъ гудай пул авач заз, руш,
На бубадиз минет ая.
* * *
Гамун юкьвал пуд цуьк ала,
Я гамунал ацукьай къвед.
Низ жагъана рикӀин мурад,
И дуьнядал кана чун кьвед.
* * *
Кьил хураваз вун цел фимир,
Руш, куь кӀвализ гада къведа.
Зун хуьремаз, патал фимир,
Ахпа, руш, вун пашман жеда.
* * *
Гур булахдин яд къайид я,
Са истикан яд це на заз.
Я руш, за ваз сир гьикӀ гуда?
Белки, кьисмет жедач чун чаз.
* * *
На бустандиз яд куьз гузва,
Цава марфад стӀал аваз?
Вучиз ви вил пата ава,
КӀани гада къуншидаллаз?
* * *
Кьакьан дагъда рагъ акьурла,
Живед маргъал цӀрадачни?
На масадаз сир гайила,
РикӀин дамар кьурадачни?
* * *
ПӀинид тарцин къацу пешер,
Жанг ягъайла, хъипи жезва
Вун ахварай аквадай кьван
Кьилин чӀарар рехи жезва
* * *
Къацан юкьвал къуьрен шапӀа,
Диде квахьна, къекъвезава.
Фикир пара мийир, суна,
Вун кӀаниди зун язава.
* * *
Заз ахварай вун акуна,
Келегъадин пӀипӀ гъилеваз.
Мус къведа, руш, вун чи кӀвализ,
Тафта перем буйдал алаз?
«Лезги газетдин» 2025-йисан 38-нумрадай
