Уьлкведин бязи агьалийриз яшайиш­дин жигьетдай кьезилвилер (льготы) талукь я. Ихьтин ксаривай а кьезилвилер гьа­къикъи жуьредани къачуз, абурун эвез­да пулунин такьатар къачудай къайдани хкягъиз жеда.

Талукь агьалийри, адет яз, гьар йисан 1-октябрдалди НСУ (набор социальных ус­луг) гьакъикъи жуьреда ва я пулунин такьатар яз къачун хкяна кIанзава. Эгер арза вугун тавуртIа, яшайишдин къуллугъар­ гьакъикъи жуьреда тайинарзава. Эгер яша­йишдин къуллугърин набор тамамдиз ва я адан са тайин паюнин эвез яз пулунин­ такьатар къачуз кIан хьайитIа, и дуьшуьшда­ МФЦ-да арза кхьин герек жезва. Арза са сеферда кхьизва ва ам агьалиди вичин­ фикир дегиш хъийидалди къуватда амукьзава. МФЦ-дин пешекарри къейдзавайвал, кьезилвилериз талукь яз агьалиди хкя­на­вай къайда нубатдин йисан 1-октябрдал­ди къуватда жезва. Эгер кьезилвилер кIан­завачиз ва я абур къачунин къайда дегишариз кIан хьайитIа, агьалидин арза нубатдин йисан 1-январдилай къуватда гьатзава.

Арза вугун патал паспортни СНИЛС гваз МФЦ-диз фена кIанда. Малум тирвал, 2025-йисан 1-февралдилай яшайиш­дин къуллугърин набордин гьар вацран­ гьакъи 1728 манатни 46 кепекдикай­ иба­рат я. Адак акатзава: 1331,30 м — дар­манар­ ва рецептдай тайинардай ме­ди­цинадин затIар, инвалид аялриз талукь махсус тIуьн; 205,95 м — санаторийда-ку­рортда сагъар хъувуниз талукь путёвка; 191,21 м — сагъламвал мягькемар хъувун патал шегьерда тайин чкадиз ва я маса шегьердиз улакьда аваз финин гьакъи.

Яшайишдин къуллугърин набордин­ къимет гьар йисуз артухар хъийизва. Ну­батдин сеферда ихьтин серенжем 2026-йисан 1-февралдиз кьилиз акъатда.

Аял прописка авун

Аял яшамиш жезвай чкада регистрация авун патал МФЦ-диз ихьтин документар гваз фена кIанда: диде-бубадин пас­портар, аял дидедиз хьайивилин гьа­къин­дай шагьадатнама, дуьз адрес къалурнавай справка.

Эгер диде-буба кьилди яшамиш жез­ватIа, кьвед лагьайда чарчел кхьенвай разивал гун герек я. Аялдин прописка ди­де-бубадикай садахъ галаз санал авуна кIанзава. Эгер диде-буба гьар жуьре адресра яшамиш жезватIа, аял абурукай гьар гьи адресда кIан хьайи­тIани регистрация ийиз жеда. Аялдин 14 йис тамам жедалди регист­рациядин шагьадатнама гузва, 14 йис тамам хьайидалай кьулухъ паспортда штамп эцигзава. 14 йисан яшарив агакь тавунвай аял прописка авун патал диде-бубадин паспортда адан тIвар кхьин чарасуз я. Паспортда ихьтин кхьинар авун патал герек я: диде-бубадикай садан паспорт, аял дидедиз хьайивилин гьакъиндай шагьадатнама ва МВД-да ацIурай арза. Прописка авунин къуллугъ МФЦ-да пулсуздаказ кьилиз акъудзава.

«Лезги газет»