Пул тIуьна
МВД-дин Дагъустанда авай силисдин управлениди Россиядин ФСБ-дин Дагъустанда авай управленидин материалрай Россиядин УК-дин 159-статьяда (лутувал) къалурнавай тахсиркарвилерин лишанрай уголовный дело къарагъарнава.
Тайинарнавайвал, государстводин образованидин са идарадин бухгалтерди, электронный реестрдиз къуллугъчийриз мажиб гуда лагьай тапан делилар акъудуналди, гьакъикъатда а идарада кIвалах тийизвай ксарин тIварцIихъ тайинарна, бюджетдин такьатар чуьнуьхна.
Вичик тахсир кутунвайда образованидин идарадин директордин электронный жуьредин рекъемрин къул ишлемишнава. Рекъемрин къул адан ихтиярда хьун къанунди къадагъа ийизвай кар я.
Тапан реестррин бинедаллаз Федеральный казначействодиз кассадин харжийрин заявка рекье туна. Къачур пулар (умуми кьадар 10 миллион манатдилай артух я) тайинарай тапан къуллугъчийрин банкунин счетриз ракъурна ва вичин рикIиз кIан хьайивал абур ишлемишна.
Шак физвайдан гьерекатар государстводин гзаф кьадар такьатар чуьнуьхунин тахсиркарвал яз гьисабзава. Алай вахтунда силисдин серенжемар кьиле тухузва.
ЧIуру агьвалатар
29-сентябрдилай 5-октябрдалди Дагъустандин мулкара улакьрихъ галаз алакъалу 25 авария хьана. Идакай чаз МВД-дин Госавтоинспекцияди хабар гана.
Арадал атай чIуру агьвалатрин нетижада 4 кас кьена (абурукай сад аял тир) ва 38 касдал (абурукай 3 аял я) жуьреба-жуьре хирер-кьацIар хьана.
Госавтоинспекциядин къуллугъчийри пиян яз машин гьалзавай 86 кас дуьздал акъудна. Абурукай 8 водителдиз талукь яз, пиян гьалда аваз машин гьалзавай дуьшуьш тикрар хъхьуниз килигна, РФ-дин УК-дин 264-статьядай уголовный делояр къарагъарна.
Пиян гьалда аваз машин гьалуникди мукьвал-мукьвал мусибатдин агьвалатар арадал къвезва. Госавтоинспекциядин къуллугъчийри улакьар гьалдай чIавуз жуван ва масабурун уьмуьрар хаталувилик кутазвай гьерекатар тавун герек тирди рикIел хкизва.
Чи мухбир
