И йикъара 86-йисан яшда аваз СтIал Сулейманан райондин Курхуьруьн 2-нумрадин юкьван мектебдин муаллим, РД-дин образованидин отличник, РФ-дин журналистрин ва писателрин союзрин член, гьуьрметлу хизандин кьил, яргъал йисара «Лезги газетдин» редакциядихъ галаз сих алакъаяр хвейи мухбир Райсудин Жалавханович Набиев яргъал чIугур начагъвилик рагьметдиз фена.
Р.Ж. Набиев 1940-йисан 27- июндиз Курхуьрел лежбердин хизанда дидедиз хьана. Аял ва жаван вахтар Ватандин ЧIехи дяведин йисарал ацалтнатIани, хци зигьин авай гадади школада хъсан къиметар аваз кIелна. Школа акьалтIарайдалай гуьгъуьниз ада пуд йисни зура армиядин жергейра къуллугъна.
Вичин зегьметдин рехъ хайи хуьруьн школада старший пионервожатыйвиле кIвалахунилай гатIунна. КIвалахни ийиз, Р. Набиева СОГУ-дин филологиядин факультетни заочнидаказ акьалтIарна. Пионервожатый ва муаллим яз, Райсудин Жалавхановича школада саки 60 йисуз кIвалахна. И везифаяр тамамардайла, ам ВЛКСМ-дин ЦК-дин ва Вирисоюздин пионеррин организациядин Центральный Советдин Гьуьрметдин грамотадиз, «Лап хъсан вожатый» знакдиз лайихлу хьанай.
Яратмишдай алакьунар гьеле адан 12 йис тирла винел акъатна. 1952-йисуз райондин «Колхоздин пайдах» газетда адан сад лагьай макъала чапнай. Адан гъиликай вишералди очеркар, макъалаяр, гьикаяяр, шиирар хкатна. «Лезги газетдилай» гъейри, ада са жерге маса газетрин, журналрин редакцийрихъ галазни алакъаяр хуьзвай.
Мухбир, публицист, шикилчи хьиз, Райсудин Набиев гьикаятчи, шаирни тир. Адан гъиликай шиирринни гьикаяйрин «Сифте чубарук», «Дустариз салам!» ктабар, тарихдин «Зи хайи хуьр» ктаб, вичин хуьруьнвияр тир полковникрикай, подполковникрикай ва майоррикай гьазурнавай «Чинерал чIехи гъетер» ктаб, «Курхуьруькай ва адан агьалийрикай тарихдин очеркар», «Бахшбендер», «Макъалайрин чIалалди» кIватIалар, манидарар тир Агъамирзоев Мирзебутаякай ва Савзиханова Зумриятакай ктабар хкатнава.
Набиев Райсудин Жалавханович рагьметдиз финихъ галаз алакъалу яз, адан хизандиз, мукьва-кьилийриз, дериндай хажалат чIугунивди, башсагълугъвал гузва. Адан экуь къамат хуьруьнвийрин, къелемдин дустарин ва юлдашрин рикIерай акъатдач.
Яргъал йисара лезги публицистикадин хиле кIвалахунай ва «Лезги газетдин» редакциядихъ галаз алакъаяр хуьнай 2024-йисуз Р.Ж. Набиев «Лезги газет»-100 йис» медалдизни лайихлу хьанай.
«Лезги газетдин» редакциядин коллективди, Райсудин Жалавханович Набиев рагьметдиз финихъ галаз алакъалу яз, адан хизанриз, вири мукьва-кьилийриз башсагълугъвал гузва.
