И йикъара меркезда Россиядин милли гвардиядин Махачкъаладин военный частуна (соединение) моторизованный махсус полк арадал атана 15 йис тамам хьуниз талукь тир шад мярекатар кьиле фена. Полкуниз лишанлу югъ тебрик авуниз талукьарнавай шад мярекатдин гьуьрметлу мугьманрин арада военный частунин командир, генерал-майор Дмитрий Чистяков, РД-дин Кьилин ва Гьукуматдин Администрациядин регьбердин заместитель — РД-дин АГиП-дин крарин Управленидин начальник Наип Сепиханов, Махачкъаладин гарнизондин военный прокурор, юстициядин полковник Сергей Соколов, моторизованный махсус полкунин командир Шамил Ахкубегов, къуллугъдин везифаяр кьилиз акъуддайла, телеф хьайи ксарин хизанрин членар, гьакIни Вирироссиядин общественный «Гъалибвилин волонтёрар», «Движение Первых» гьерекатрин векилар, юнармейчияр, къуллугъдин ветеранар авай.
Мярекат, къуллугъдин везифаяр кьилиз акъуддайла, телеф хьайи ксарин экуь къаматар рикIел хуьнин лишан яз, гьаятда абуруз хкажнавай памятникдал цуьквер эцигунилай ва декьикьада кисна акъвазунилай башламишна.
Генерал-майор Дмитрий Чистякова полкунин личный составдиз лишанлу вакъиа тебрикна, къуллугъдин вилик эцигнавай жавабдар вири месэлаяр виниз тир пешекарвал ва кардиз вафалувал къалуруналди лайихлудаказ кьилиз акъудзавайди къейдна.
— Зун инанмиш я, инлай кьулухъни куьне вилик эцигнавай гьар гьи жуьредин хьайитIани везифаяр агалкьунралди ва баркалла алаз кьилиз акъудда. Гьакъисагъ зегьметдин нетижада, вири четинвилериз дурум гуналди, къенин юкъуз полкунихъ баркаллу тарих ава. Ватандин итижар хуьдайла, къуллугъдин везифаяр кьилиз акъуддайла, телеф хьайи чи юлдашар, абурун хизанар чна садрани рикIелай алуддач. Абурун экуь къаматар чи рикIера гьамиша амукьда. Къенин лишанлу юкъуз заз гьакIни чи къуллугъдин ветеранрин тIварарихъни чими келимаяр лугьуз кIанзава. Абуру чпин къуллугъдин ва уьмуьрдин тежриба жегьилрив агакьарзава, чаз абур бедендизни руьгьдиз мягькембур яз тербияламишунин крара куьмекзава. Кьилиз акъудзавай къуллугъдай, гьакIни женгинин дуствилин баркаллу адетар хуьнай куьн сагърай. КьетIендаказ заз чи хизанриз — далу патаз, къуллугъдин четинвилерин гъавурда акьазвай, чун руьгьламишзавай, чаз куьмекзавай ксаризни сагърай лугьуз кIанзава. Личный составдиз юбилей тебрик авунихъ галаз сад хьиз, заз квехъ виридахъ мягькем сагъламвал, хизанра хушбахтлувал хьана кIанзава, — алхишна ада.
Ш. Ахкубегова кIватI хьанвайбур полкунин тарихдихъ галаз танишарна, адан везифа Ватан хуьн тирди къейдна.
Юбиляррин тIварарихъ чими келимаяр лагьайбурун арада Н. Сепиханов, С. Соколов ва масабурни авай.
Шад мярекатдин сергьятра аваз, чпин везифаяр намуслудаказ кьилиз акъудзавай къуллугъчияр государстводин ва ведомстводин шабагьар, чухсагъулдин чарар ва къиметлу пишкешар гуналди къейдна.
Росгвардиядин Махачкъаладин военный частунин военный оркестрди (регьбер — Дагъустандин лайихлу артист, майор Ильяс Бектемиров), Даггосфилармониядин артистри кIватI хьанвайбуруз концерт гана.
Жегьил мугьманар патал махсус техникадин ва яракьрин выставка ачухнавай. Мярекатдин иштиракчийриз аскеррин столовойда тIуьнар дадмишдай мумкинвални авай.
Рагнеда Рамалданова
