Играми ватанэгьлияр! Акваз-такваз, 2025-йисни яваш-яваш эхирдиз мукьва жезва. Им цIийи 2026-йис патал куь рикI алай газетарни журналар кхьидай вахт алукьнава лагьай чIал я. И кардихъ галаз алакъалу яз, чна квез сифте нубатда чи халкьдин кьилин газет тир «Лезги газет» ва хайи чIалал акъатзавай амай изданияр кхьиниз эвер гузва.
Вилик йисара хьиз, цIини «Лезги газет» почтадин алакъадин отделенийрай, «Дагпечатдин» киоскрай ва газетдин редакциядай кхьиз жеда. Къиметар чна агъадихъ гузва: киоскрай ва редакциядай газет кхьидай къиметар дегиш хьанвач. Почтадин алакъадин отделенийрай къимет саки 37 манатдин багьа хьанва. Къейд ийин хьи, газет кхьинин къиметар редакцияди тайинарзавайди туш, абур газетар кIелзавайбурал агакьарзавай идарайри тайинарзава.
РикIел хкин, Кьиблепатан Дагъустанда «Дагпечатдин» киоскар Дагъустандин Огни, Дербент шегьерра, Белиж поселокда, Кьасумхуьрел, Мегьарамдхуьре ва Ахцегьа кардик ква. «Лезги газет» чи халкь садзавай къуват, чIал хуьзвай ва вилик тухузвай такьат я. Гьавиляй ам хайи чилин, чIалан къадир авай гьар са лезгидин кIвале хьана кIанда.
«Лезги газет»
