Школайра, аялрин бахчайра кIвалахзавай муаллимар, тербиячияр кьетIен инсанар, пешекарар яз гьисабзава за. Абуру акьалтзавай несилдиз чирвилер, тербия гузва, абурун зигьин, кьатIунар артухарзава, абурукай жемиятдиз хийир авай инсанар хкатдайвал ийизва. Ибур лап важиблу месэлаяр я, гьавиляй и кIвалахар нелай хьайитIани алакьдач.
Шадвал кутадай кар я: хиве авай везифаяр намуслудаказ кьилиз акъудзавай, аялрикай Ватандиз вафалу инсанар хьун патал зегьмет чIугвазвай инсанар СтIал Сулейманан райондин образованидин хиле гзаф ава. Абурукай сад Агъа СтIал-Къазмайрин аялрин «Чубарук» бахчада тербиядинни методикадин рекьяй заведующийдин заместитель Куругълиева Тамила Бугьадиновна я.
Аялрин бахчада кIелунинни тербиядин кIвалах тешкилунай ва вилик тухунай, бицIекриз хъсан тербия гунай ва яргъал йисарин бегьерлу зегьметдай Т. Куругълиевадиз алай йисуз Дагъустан Республикадин образованидин ва илимдин министерстводин гьуьрметдин грамота гана. Ам адав райондин кьил Саид Темирханова шад гьалара вахкана.
— Тамила Бугьадиновна чи коллективда хъсан чирвилер авай, везифайрив жавабдарвал гьисс авуналди эгечIзавай пешекаррикай сад я, — лугьузва бахчадин заведующий Рена Фахрудиновна Рагьмановади. — Адаз бицIекар вичин веледар хьиз, абурузни ам чпин диде хьиз кIанда. Тамила Бугьадиновнадиз кIвалахдин юлдашрин, бицIекрин диде-бубайрин патай еке гьуьрмет ава. Им адан бахт я.
Т. Куругълиевадихъ галаз авур ихтилатрай якъин хьайивал, аялрихъ галаз кIвалахунай, бицIекри чирвилерин алемдиз къачузвай сифте камарай ва вичин пешедай адаз руьгьдин таъминвал жагъизва.
Тамила 1992-йисан 30-январдиз Украинадин Днепропетровск шегьерда дидедиз хьана. Аял ва жаван йисар Агъа СтIал-Къазмайрал акъатна.
Хуьруьн юкьван школа 2008- йисуз акьалтIарай руш Дагъустандин госуниверситетдин физический факультетдик экечIна. 2013- йисуз анаг хъсан къиметар аваз куьтягьна.
— 2015-йисуз Агъа СтIал-Къазмайрал 120 аялдиз чка авай алай аямдин аялрин «Чубарук» бахча ачухна. Гьа йисалай инихъ за гьана аялрихъ галаз кIвалахзава. И кардал за шадвалзава, — лугьузва Тамила Бугьадиновнади.
Сифтедай Т. Куругълиевадикай тербиячи хьана. Ада гьар юкъуз бицIекрихъ галаз рикI аладардай жуьреба-жуьре мярекатар, зигьин, кьатIунар, къанажагъ хкаждай къугъунар тухуз хьана. И карди хъсан нетижани гана. И кар себеб яз, Тамила Бугьадиновна 2022-йисуз тербиядинни методикадин рекьяй аялрин бахчадин заведующийдин заместителвиле тайинарна.
«Чубарук» бахча неинки чи районда, гьакI санлай Кьиблепатан Дагъустанда школада кIелдай вахтунилай виликан яшдин аялрин идарайрин арада вилик жергейра авайбурукай сад я. Им, гьелбетда, аялрин бахчадин дуствилин коллективдин, абурукай яз, Т. Куругълиевадин намуслу зегьметдин нетижа я.
Гьеле аялрин бахчада тербиячи яз кIвалахзавай йисара Тамилади, районда тухузвай конкурсра иштиракиз, приздин чкаяр кьаз хьана. ИкI, 2019-йисуз дидед чIалай машгъулатрин кIвалахар тухунай «Чубарукди» райондин аялрин бахчайрин арада 1-чка кьуна. Идай Тамиладиз 2020-йисуз райондин кьили чухсагъулдин чар гана.
2023-йисуз М. Куругълиевади спикер яз ва «Семейный клуб как форма повышения педагогической комплектности родителей» тема гваз «Организация просвещения родителей в ДОО»» республикадин педработникрин илимдинни практикадин конференцияда иштиракна.
2024-йисуз «Шарвили» эпосдиз талукьарна тухвай мярекатра активнидаказ иштиракунай Т. Куругълиевадиз мергьяматлувилин «Умуд» фондунин патай гьуьрметдин грамота гана.
2024-йисуз Тамила Бугьадиновна ДГПУ-дин магистратурадин школадилай вилик квай (дошкольное) отделенидик экечIна. Ада Армавир шегьерда тухвай педагогвилин устадвилин «Воспитатель XXI века» Вирироссиядин конкурсда иштиракна ва гъалибвал къачуна.
Ада гьакIни «Совершенствование образовательного процесса в соответствии обновленного ФГОС дошкольного и начального образования» республикадин конкурсда спикер язни иштиракна.
Тамила Бугьадиновнадиз, чна винидихъ тIварар кьур гьуьрметдин грамотайрилай ва чухсагъулдин чарчелай гъейри, райондин образованидин отделдин, «Чубарук» бахчадин заведующийдин патай ганвай грамотаярни ава.
— Жуван пеше аялрихъ галаз алакъалуди хьун, абурун диде-бубайри жуван кIвалахдилай разивал авун зун патал виридалайни еке шабагь я, — лугьузва Т.Б. Куругълиевади. — Гьар юкъуз бицIекрин арада хьунилай маса шадвал, бахтлувал авани кьван инсан патал?! Зи мурад вири аялар, гьабурукай яз «Чубарукда» тербия къачузвай бицIекарни, бахтлу, шад ва сагълам хьун я.
Вахъ мягькем сагъламвал, хизанда хушбахтлувал, кIвалахда мадни еке агалкьунар хьурай, гьуьрметлу Тамила Бугьадиновна.
Хазран Кьасумов
