Дагъустандин халкьдин шаир Арбен Къардаш «От края до края» конкурсда гъалиб хьана
Мукьвара «Литературный перевод как диалог культур» лишандик кваз элкъвей стол кьиле тухузвай чIавуз Россиядин писателрин союзди яратмишунрин таржумайриз талукьарнавай «От края до края» конкурсдин гъалибчияр раижна.
Гьикаятдин жанрда гъалиб хьайи 10 касдин арада Дагъустандин халкьдин шаир, лезги гьикаятчи Арбен Къардашни ава. Ада конкурсдиз вичи таржума авунвай ва 2024-йисуз «Дагъустан» чапханади акъуднавай «Чандар — дерево жизни» ктаб вуганвай.
Гъалибчийрин кIвалахар машгьур «ЛитРес» сайтдиз акъуддайвал я. И карди агъзурралди кIелзавайбуруз чи къелемдин стха Арбен Къардашан ктабни кIелдай мумкинвал гуда.
Къейд ийин хьи, мукьвара, Дагъустандин халкьарин садвилин йикъан къаршида, зегьметдин рекье къалурнавай агалкьунрай ва гьакъисагъ зегьметдай республикадин премьер-министр Абдулмуслим Абдулмуслимова Арбен Къардашав РД-дин Гьукуматдин патай Разивилин чар вахкана.
«Лезги газетдин» редакциядин коллективди Арбен Къардашаз яратмишунрин алемда хьанвай нубатдин агалкьун мубаракзава. Къуй чи гьуьрметлу шаирдихъ мадни кьакьан кукIушрихъ фидай къуватарни мумкинвилер хьурай.
«Лезги газет»
