Чаз кхьизва
Гьуьрметлу «Лезги газетдин» редакция!
Гуманизм чаз жемиятдин крарани алакъайра гьахъвал, инсанвал, мергьяматлувал яз чида. «Лезги газетдин» 32-нумрада чапнавай «Буржарин чилина» макъала кIелайла, аквазва хьи, республикада медицинадин буржар алай идарайрин месэла са шумуд сеферда къарагъарнатIани, ам гьялна акьалтIариз жезвач. И макъаладай гьакIни якъин жезвайвал, республикадин бязи районра медицинадин идарайра медицинадин къуллугъчийрилай административный къуллугъчияр гзаф я. Дагъустанда здравоохраненидин хилел гуьзчивал тухузвай Федеральный къуллугъдин территориальный органдин регьбер Тамирлан Мугьамедован гафаралди, «са идарадин экономистрин мажибар духтурринбурулай екебур тир», яни екебур я.
«Лезги газетдин» алай йисан 30-нумрадиз акъатнавай «Аялрин гележегдикай фикирзавай» макъаладай ашкара жезвайвал, Махачкъаладин Турали, ЦIийи Хушет поселокра алай вахтунда аялрин кьадар 30 агъзурдалай алатнава. Махачкъаладин 4-нумрадин аялрин поликлиникадин заведующий Этэри Шихамировадин гафаралди, ада регьбервал гузвай медицинадин идарада 65 духтурдини 85 медсестради кIвалахзава. Ада гьакIни къейдзавайвал, духтурриз кIвалахиз четин хьанва. Мисал яз, педиатрдин гуьзчивилик квай гьар са участокда 2000-дав агакьна аялар яшамиш жезва. Гьар са педиатрди, нормайрал асаслу яз, 800 аялдиз къуллугъ авун лазим я.
ЦIийи Хушетда аялрин поликлиника кардик кутада лугьудай ванер аваз са шумуд йис я, амма гафар гьа гафар яз амукьзава.
И кьве макъала кIелайдалай кьулухъ ихьтин фикир арадал къвезва: са патахъай акI жезва хьи, республикадин бюджетдин такьатар нубатсуз рекьера харжзава, муькуь патахъай — республикадин бюджетда бес кьадар такьатар авач. Мисал яз, — гьакьван герек тир поликлиника эцигдай. И месэлайрикай талукь органриз, ксариз чпизни хабар авачиз туш. Амма месэлайрал кIукI къвезвач. Бес чна, жергедин агьалийри, вуч авун лазим я?
Абдулашим Гьажимурадов
