Йикъари — гьафтеяр, гьафтейри варцар эвез ийиз, вахтуни датIана виликди еримишда. Шалбуз, Кетин дагъларин кукIушрал ацукьнавай живер чаз мукьвал-мукьвал аквазва. Ида кьуьд мукьва жезвайдакай хабар гузва.

Алерар вахтундамаз гьазура, лугьуда бубайрин камаллу мисалда. КIвалера цIаяр хъийидай сезон лугьузвай зулунни хъуьтIуьн вахтунизни гьазурвилер акун чарасуз я. И жигьетдай СтIал Сулейманан районда вучтин серенжемар кьиле тухванва, вилик гьихьтин кIвалахар кума? И суалдиз жаваб жагъурунин мураддалди чун райадминистрациядин «ЖКХ и Благоустройство» МКУ-дин директор Икрам Эйзудинович Нежведиловахъ ва рекьерин ремонтрин эцигунрин управленидин райондин  филиалдин директор Руслан Садилагьович Дадашевахъ галаз гуьруьшмиш хьана.

Икрам Нежведилова лагьайвал, 2025-2026-йисарин цIаяр хъийи­дай сезондиз гьазурвилер акунин му­раддалди райондин администрациядин къарардалди тухудай серенжемрин план туькIуьрна, комис­сиядин состав тестикьарнава. Адан бинедаллаз газдин, экверин ва чимивал гудай объектар зулунни хъуь­тIуьн  сезондиз  гьазурунин  план  ви­ри идарайрин кьилерал агакьарнава. И жигьетдай тайин кIвалахни тухванва.

Райондин мулкунал гзаф квартирайрин 8 кIвалер ала. Абур цIаяр хъийидай сезондиз гьазур хьунин паспортар РД-дин Госжилинспекциядихъ галаз меслятнава.

Умуми образованидин пуд идарадиз (Пиперхуьруьн, Ичинрин ва Татарханрин ООШар) газ тухванвач. Анриз 45 куб кIарасар къачун патал арза ганва.

Агъа СтIалрин СОШ-дай Герейханован 1-нумрадин СОШ-диз резервда авай котел хутахнава.

Герейханован 1-нумрадин СОШ-да алава котелар эцигунин кIвалахар 15-октябрдалди акьалтIарда. ГьакIни Алкьвадрин, Вини СтIалрин ва Кьасумхуьруьн 1-нумрайрин СОШ-риз резервдин котелрин агрегатар къачунин чарасузвал ава.

Районда кардик квай образованидин идараяр зулунни хъуьтIуьн вахтунда чимиви­лелди таъминару­нин мураддалди талукь серенже­мар кьабулна акьал­тIар­нава. Кьилди къа­чуртIа, образованидин идарайра чими ийидай къурулушар михьнава, кIва­лахдай къайдадиз гъанва.

Кьасумхуьрел «Сор­товой» мик­ро­райондин агьа­ли­яр атIунар авачиз­ электроэнергиядалди таъ­ми­на­рун­ па­тал, рай­ондин­ бюджетдай 860 агъ­зур манат пул гана, 250 кВт-дин къуват авай КТП маса къачуна, ­эцигна.

Мекьивилер жедалди­ «ЖКХ и Благоустройство» МКУ-ди хуьрерин чIуру гьалда авай, хъуьтIуьн вахтунда кьел ва къум вегьена кIан­завай чкадин метлебдин ре­кьерин­ учас­токрин реестр туькIуьр­на­ва. Абурук Кьасум­хуьрел Аминован, Сов­хоз­ная, Ленинан куьчеяр ва куьгьне муьгъ, Алкьвадрал Школьная, Кьулан СтIал­дал Центральная, Карчаг­ская ва Ленинан, Агъа СтIалдал СтIал Сулейманан, Орджоникидзедин ва Агъасиеван, Вини СтIалдал Комсомольская куьчеяр акатзава. Анагар талукь къуллугърин кьетIен гуьзчивилик жеда.

Зулунни хъуьтIуьн вахтунда рекьер, хъутIаларни къекъуьнар квай куьчеяр хатасузбур авун патал гьар йисуз райондин РСУ-дини еке кIва­лах тухузва. Ана, санлай къачурла, 23 касди кIвалахзава, абурун чIехи пай (18 кас) рекьерин рабочияр, шоферар ва механизаторар я. Идарадихъ экскаватор, автогрейдер, МТЗ-80 трактор, «КамАЗ» ва кьве УАЗ автомашинар ава.

Филиалдин директор Руслан Да­­дашева лагьайвал, «Мамрач-Ташка­пур-Араканский мост», «Ка­сум­кент-­Ашагастал», «Куркент-Кар­чаг-Сир­тыч»­ автомобилрин рекьера, яд фи­дай чкаяр михьна, 600 кв. метр­дин майданда рекьера акъатнавай лекъвер, фурар ацIур хъувуна, 542 кв. метрда рекьерин къерехар мягькемарна, «Касумкент-Уллугатаг» накь­­вадин рекьиз къумадинни чиргъедин къаришма вегьена. Ихьтин кIвалахар, кьуьд алукьдалди, «Цмур-Качалкент-Хпюг» ва «Касумкент-Ново-Испик-Шихикент» автомобилрин рекьерани авун пландик кутунва.

ТIебиатдин татугайвилер себеб яз, къайдадикай хкатунин къурхулувал авай рекьерин участокар кьетIен гуьзчивилик жезва, месела, — «Касумкент-Цмур-Ашагамака» рехъ.

«Автомобилрин рекьер хъуь­тIуьн сезондиз гьазурун патал серенжемрин план туькIуьрнава, — лугьузва Руслан Дадашева. — Бес кьадар герек материалар хкана, чкадал ала».

Карханади 5400 литр кудай ва ягъламишдай шейэр, 17,5 тонн къум, 10 тонн технический кьел, 500 м3 куьлуь чиргъедин къаришма хканва.

Селлер атуникди къайдадикай хкатай рекьерин участокар арадал хкунин мураддалди 2000 куб. метр къумадинни чиргъедин къаришмани хкана, чкадал ала.

ХъуьтIуьн вахтунда рекьер нормайрив кьадай гьалдиз хкунин кIва­лахар давамарда. И жигьетдай карханадин коллективдихъ виликан йисарин хъсан тежрибани ава.

Винидихъ гъанвай мисалри шагьидвалзавайвал, районда зулунни хъуьтIуьн сезондиз гьазурвилер акунин рекьяй тайин кIвалах тухвана, герек серенжемар кьиле тухун давамарзава.

И важиблу месэла райондин кьил Саид Темирханован кьетIен гуьзчивилик ква. Ада талукь къуллугърин, АСП-рин вилик везифаяр эцигнава, абур кьилиз акъудунал гуьзчивалзава. Тухузвай кIвалахди ва кьабулзавай серенжемри, са рахунни алачиз, хъсан нетижани гуда.

Хазран Кьасумов