Са варз вилик хьиз чна газетда Кьурагь райондин Ашарин хуьряй тир викIегь хва Халикьов Жаврудинан баркаллу кра­ри­кай кхьейди тир. Къанни ирид йисуз МВД-дин органра лайихлувилелди къуллугъ авур ва эхиримжи са шумуд йисуз Кьурагь  райондин администрацияда информациядин­ технологийрин ва печатдин центрадин регьбервиле кIвалахзавай кас алатай йисан октябрдиз, вичин къуллугъни туна, гуь­гьуьл­лувилелди дяведин махсус серенжемдиз фена. Са йисан икьрардин вахт куьтягь хьана хтанватIани, ада «БАРС» батальондихъ, вичин женгинин юлдашрихъ галаз алакъа атIанвач. Ингье и йикъара чаз Халикьован мад са баркаллу, дамахдай кардикай хабар хьана.

«БАРС» батальондин вилик эцигнавай везифаяр хаталубур ва муракаббур тир. Женгер кьиле физвай майданрилай хирер хьайибур саламат чкадиз ахкъудун ва, сифте куьмекни гана, абур санчастариз агакьарун, частариз, полкариз яракьар, суьрсет, душмандихъ галаз женг чIугунин карда герек къвезвай маса шейэр тухун, регионрай рекье  твазвай кьван куьмекдин аявал авун, аскеррив агакьарун…

«Ватан хуьзвайбур» фондуник квай Халикьова СВО-дин иштиракчийрин ва абурун диде-бубайрин бязи тIалабунар, тапшуру­гъар тамамарзавай. Махачкъалада яшамиш жезвай Салигьат лугьудай дишегьлидини Халикьов Жаврудин жагъурна, СВО-да авай, хер хьанвай ва алакъа амачир вичин хва жагъур хъувун тIалабна. Хци къуллугъзавай бригада чирна, ашарви кьегьал Луганскдин Республикадиз, женгер кьиле физвай райондиз фена, бригададин командирдихъ, замполитдихъ галаз гуьруьшмиш хьана, вич атунин себеб­ ачухна. Хер хьанвай аскер тамамдиз сагъ хъхьанвачиртIани, ада вичин юлдашрихъ галаз санал женг чIугвазвай. Им, гьелбетда, разивалдай делил тир. Хва ахкуна кIанзавай дидедин тIалабун гьикI кьилиз акъудин? Жаврудиналай командирар чIалал гъиз алакьна ва ам кьве гьафтедин отпускдиз ахъайнавай аскерни галаз Салигьат дидедин патав хтана. Хва акурла, дидедиз вичин шадвал гьиниздатIа чизвачир. Ада гагь хва, гагь Жаврудин къужахламишна. Диде ашарвидин вилик метIерал акъвазна, адаз икрамна. «Къенлай  кьулухъ вун заз стхадай я», — лагьана дишегьлиди.

Ашарин хуьре дидедиз хьайи, Къизляр райондин Сарсара (ашарвийри кутунвай цIийи хуьр) юкьван школа куьтягьай, МВД-дин Ростовда авай юридический институт акьалтIарай Халикьов Жаврудина Дагъус­тандин къайдаяр хуьдай органра зегьметдин рехъ башламишна. СОГ-дин (специальная огневая группа) командир яз къуллугъ авур йисара  ада дирибашвал, жуьрэтлувал къалурна кIанзавай хаталу гзаф серенжемра иштиракна. Садрани зайифвалнач, сивяй «алакьдач» гаф акъуднач, къуллугъдин ва гражданиндин буржи намуслу­вилелди тамамарна. Обществодиз зиян гузвай, агьалийрин секинвал, архайинвал чIурзавай дестейрин ва кьилдин ксарин вилик пад кьуна. Ахьтинбур викIегь командирдин чандиз къаст ийизни кьве сеферда алахъна. Сифте сеферда Халикьован автомашиндик бомба кутуна. Хизанни (уьмуьрдин юлдаш, аялар) авай автомашин хъиткьинарна. Аллагьдиз шукур, хирер, кьацIар хьанатIани, вири сагъдиз амукьна.

Халикьован хизандикай рахайтIа, вири Ватандиз вафалувилелди къуллугъзавай ватанпересар я. Уьмуьрдин юлдаш, полициядин майор Сураят Пирдаимовнади Рос­гвардияда къуллугъзава, кичIевал авачиз, хаталу серенжемрани иштиракзава. Ро­с­сия­дин армиядин старший лейтенант хва Ме­гьамедвелиди Запорожьедин областда лап муракаб везифаяр кьилиз акъудзава.

Жаврудинан стха АбдулмутIалиб, старший прапорщик, дяведин махсус серенжемда  аваз пуд лагьай йис я. Вичин буржи уьт­квемдиз тамамарзавай амни игит я.

Жаврудиназ секинвал тагузвай, рикI дарихарзавай месэлани ава. СВО-да сифте­ йикъалай миллетбазрихъ галаз женг чIуг­ваз­вай стха Назим Халикьов Дзержинскдин къваларив кьиле фейи женгера квахьна­, йисни зур алатзава, адакай са хабарни­ авач. СВО-дин иштиракчи тир вахтунда­ Жав­рудина Луганскдин, Донецкдин Респуб­ликайра стхадикай са куьлуь малумат хьайи­­тIани жагъурун патал гзаф алахъунар­ авуна. Гьайиф хьи, гьелелиг ам нетижадин иеси хьанвач. Гьа са вахтунда Халикьова маса аскерар кьиникьикай къутармишна, гзафбур, душмандин гуьллейрикай хкудна, саламат чкадиз тухвана.

— Жуван стха жагъуриз хьанвач, амма Салигьатан хва жагъурна, хкана ам за вичин кIвализ. Салигьат вахан гафарни заз вири шабагьрилай багьа я, — лугьузва ада.

Шабагьарни садни­ кьвед туш: «Жуьрэтлу­виляй», Жукован­­, Да­гъус­тан Рес­­публи­ка­дин «Дирибашвал къалурунай», «Махсус се­ренжемда­ иш­­ти­ра­ку­най»­, «Фронт­диз куьмек гунай» медалар, Маркелован орден, «Сагъ­рай» лугьузвай ча­рар… Абуру Ашарин­ хуьряй тир офицердин викIегьвилин, жуьр­этлувилин, уьт­квем­вилин, ватанпересвилин гьакъиндай шагьидвалзава.

— Жаврудин Жалалович халис ватан­перес ва чи халкьдин игит хва я, — лугьуз­ва адан дуст Рустам Искендарова. — Ада­вайни­, кисна вичин кабинетда ацукьна, ча­яр хъваз, вахтар акъудиз жедай. Амма Жаврудин маса къилихдин инсан я. «Ватан кIеве авай вахтунда адаз алакьдай куьмек тагун — им инсансузвал я», — лугьузва зи дус­туни. Ам райондин  вири къуллугъчийрикай СВО-диз фейи сад лагьай кас я. Адаз баркалла!

Искендарова лагьайвал, Халикьоваз, Россиядин оборонадин министерстводихъ галаз мад са йисан икьрар кутIун хъувуна, СВО-диз физ кIанзава.

Жаврудин Халикьова авур са ихтилатди гилани рикIе ванзава.

— Ватан алай вахтунда, уьлкведин Яру майдандилай, хайи макандилай, гъвечIи чIа­­­вуз къекъвей куьчедилай хьиз, СВО-дин­ окопдилай башламиш жезва. Ватан хуьн, Россиядин армиядиз куьмек гун гьар са гражданиндин буржи я. И важиблу месэладиз, СВО-дин аскерриз ва абурун диде-бубайриз кьилин фикир гузвай чи республикадин регьбер Сергей Меликоваз за сагърай лугьузва.

Нариман Ибрагьимов