Махсус серенжемдикай

РФ-дин оборонадин министерстводи малумарайва­л, 30-сентябрдин йифен береда ПВО-дин такьатри Украинадин 81 беспилотникдин вилик пад кьуна ва тергна.

Кьилди къачуртIа, 21 БПЛА — Воронеждин областдин, 25 — Белгороддин областдин, 12 — Ростовдин областдин мулкара, 11 — Курскдин областда ва 7 Волгограддин областдин мулкара тергна. Идалай вилик Волгограддин областдин Светлоярский районда украинвийри ахъаяй беспилотникди пуд хуьруьн электроэнергиядин къурулушдиз зиян ганай.

РФ-дин кьушунрин «Кьиблепад» подразделениди ДНР-да суткадин муддатда ВСУ-дин 290 аскер ва абурун яракьар тергна.

Чи кьушунрин «Центр» дестедини ДНР-дин Димит­ров, Удачное, Красноармейск, Рубежное хуьрера ва Днепропетровскдин областдин Новопавловкада украинвийрикай ибарат 4 бригададиз ягъунар кьуна. Миллетбазрикай 515 кас тергна. ГьакIни танк, женгинин вад улакь, адетдин 5 машин ва артиллериядин 4 яракь къайдадикай хкудна.

29-сентябрдиз РФ-дин оборонадин министерстводи малумарайвал, махсус серенжем кьиле тухунив эгечIайдалай инихъ Россиядин Яракьлу Къуватри Украинадин 667 самолет ва 283  вертолет, зенитный ракетайрин 631 комплекс, пилот галачиз лув гудай 87 277 аппарат, 25 291 танк ва дяведин маса машинар, РСЗО-дин 1592  машин, артиллериядин ва маса 30 044 яракь, военный махсус 42 869 автомашин тергна.

30-сентябрдиз РФ-дин Президентдин пресс-секре­тарь Дмитрий Пескова къейд авурвал, Одессадани Николаевда чпин кьисметар Россиядихъ галаз алакъалу ийиз кIанзавай, амма гьелелиг ана яшамиш хьун хаталу яз гьисабзавай ксар гзаф ава.  Идалай вилик Херсондин областдин губернатор Владимир Сальдоди «РИА Новости» чешмедиз малумарайвал, эгер Одессадани Николаевда Россиядик экечIунин патахъай референдум тухванвайтIа, абур РФ-дик кутунин къарар кьабулдай нетижадал атанвай.

Куьмекуниз эвер гузва

Финляндиядини Швецияди 2026-2027-йисара Евросоюздиз Украина патал 130 миллиард евро Россиядин активрин гьисабдай чара авуниз эвер гузва. Ихьтин гафар тIвар кьунвай уьлквейрин премьер-министрар тир П. Орподи ва У. Кристерссона Еврокомиссиядиз ра­къурнавай чарче кхьенва. Идакай «РИА Новости» чешмеди хабар гузва.

Къейдзавайвал, Украинадиз Евросоюздин патай къведай йисара гьа къалурнавай кьван пулунин такьатар герек жезва. Финляндиядин гьукуматди тестикьарайвал, тIвар кьунвай кагъаз официальный документ туш. Гьукуматдин делилралди, мукьвал йисара Украинадиз гудай такьатрин месэла 1-2-октябрдиз Копенгагенда кьиле фидай ЕС-дин регьберрин гуьруьшдал веревирдда.

Россияди СВО башламишайдалай кьулухъ Евро­союзди ва G7 клубдик акатзавай уьлквейри тахминан­ 300 миллиард евродин резервар кIеве тунай. 200 мил­ли­ард евродилай гзаф ЕС-да ава, асул гьисабдай Бель­гия­дин «Euroclear» къурулушда.

ЦIийи кьуьруькар

РФ-дин СВР-ди (Россиядин къецепатан разведкадин къуллугъ) малумарнавайвал, Польшадани Румынияда гуя беспилотникар ахъайна лагьай бинесуз хабаррилай кьулухъ Украинадин гьукумдин кьиле авайбуру НАТО Россиядал гьалдарунин алахъунар давамарзава.

«Киевди чIуру ниятралди цIийи кьуьруькар гьазурзава», — лагьанва СВР-дин малуматда.

Алакъаяр мягькемарзава

Эрменистандинни Украинадин къецепатан крарин министрар кьве уьлкведи алакъалувилелди кIвала­ху­нин патахъай меслятдал атана.

Варшавада хатасузвилин рекьяй кьиле фейи форумдал министррин арада хьайи ихтилатдикай Еревандин векилди «Х» соцсетда кхьена.

Европа аялдив гекъигна

США-дин президент Дональд Трампан махсус илчи Кит Келлога Европадин уьлквеяр велосипед гьализ вердишарзавай аялдив гекъигна. И гафарихъ галаз сад хьиз, ада гила Европадин амадагар Вашингтондин гьамишан куьмек галачизни женгерин жигьетдай чпин мес­элаяр гьялиз алакьзавайбур  яз гьисабзава.

«Велосипед гьализ вердишардайла, зи аялри чархарилай башламишна. Европадиз мад алава чархар герекзамач, абурувай гьакIни чпин кар ийиз жезва», — лагьана ада.

Гьазурайди — К. Ферзалиев