Рекъемар раижзава

Дагъустанда 2025-йисан августдин вацра йисан инфляция июлдин 8,09 процентдилай 8,18 процентдал кьван хкаж хьанва. Им СКФО-дин (7,52 процент) ва Россиядин (8,14 процент) рекъемрилай виниз тир кьадар я. Идакай, Кьиблепатан ГУ ЦБ-дин региондин отделенидал асаслу яз, «Интерфакс» изданиди хабар ­гузва.

Августдин вацра недай суьрсет ужуз хьун давам хьана. Анжах йисан гьисабдалди кьурла, недай суьрсетдин къиметар хкаж хьун инфляциядилай вине яз амукьна. Недай суьрсетдинбур тушир метягьар лагьайтIа, вацран къене багьа хьана, йисан гьисабдалди абурун къиметар уртабабдаказ виниз акъатна…

ИкI, недай суьрсетдин метягьрин къиметрин йисан ериш августдин вацра, июлдин 9,78 процентдилай кьулухъ, 9,34 процентдал кьван яваш хьана.

Регионда емишринни салан майвайрин суьрсетдин къиметар агъуз аватиз башламишна, кьилди къачуртIа, — чичIекрин, помидоррин, картуфрин, ичерин… Къейдзавайвал, и кардин себебни саларин бегьеррин кьадар артух хьун я. Гьа са вахтунда, йисан гьисабдалди, емишринни салан майвайрин продукциядин къиметар 1,64 процентдин хкаж хьана. Чешмеди и делилрихъ галаз санал раижзавайвал, чIемедин ва ягълуйрин къиметар агъуз хьанвайди къейд­нава.

12 вацран къене сад-садал эхцигнавай нетижадалди чIем ва ягълуяр 24,07 процентдин багьа хьанва.

Чешмеди гъизвай делилралди, недай суьрсетдинбур тушир метягьрин ­къи­­метар хкаж хьуниз талукь йисан ериш, июлдин вацран 4,85 процентдилай­ кьулухъ 7,27 процентдал кьван артух хьанва.

Мотордин ягъ багьа хьун давам хьана. И метягь багьа хьун ам жуваз акъваззавай къимет (себестоимость) тупуналди маса гудай (оптовый) базарда артух ва регионда чуьлдин кIвалахрин сезондин вилик и продукциядихъ авай игьтияж хкаж хьунихъ галаз алакъалу я. Идалайни алава яз, базарда и метягь маса гун тIимил хьанва. Санлай къачурла, йисан умуми нетижадалди, мотордин кудайдан къимет 11,69 процентдин виниз ­акъатнава.

Дагъустанда июлдин вацра базовый инфляция июлдин 8,93 процентдилай гуь­гъуьниз 9,22 процентдал кьван виниз акъатнава.

Къейд ийин хьи, чешмеди, винидихъ тIварар кьунвайбурулай гъейри, регионда гьакI маса шейэрин къиметрин дегишвилериз талукь делиларни раижнава.

Мад сеферда бегьердикай

РД-дин хуьруьн майишатдин ва недай суьрсетдин министерстводин телеграм-ка­налди раижзавайвал, Дагъустандин ­аг­­рарияр техил патал гьасилзавай гьа­­жибугъдаяр кIватI хъувунал машгъул хьанва.

И магьсулди республикада 12 агъзур гектардилай гзаф мулкар кьунва. Минис­терстводин делилралди, гьажибугъдаяр­ цанвай виридалайни еке майданар и чкайра ава: Хасавюрт районда — 3,4 агъзур гектар, Дербент районда — 1,4 агъзур гектар, Къизляр районда — 900 гектардилай гзаф, Новолак ва Гумбет районра — гьарна — 700 гектар.

Гьа са вахтунда «Интерфакс» изданиди, РД-дин хуьруьн майишатдин ва недай суьрсетдин министерстводин пресс-къуллугъдал асаслу яз, раижзавайвал, Дагъустандин аграрийри 46,7 агъзур тонн техил патал гьажибугъдаяр кIватI хъувун пландик кутунва.

Виликдай Дагъустанда 7,3 агъзур гектардай 209,1 агъзур тонн бахчадин няметар кIватI хъувунвайдакай хабар ганай­. Кьилди къачуртIа, буранар гьеле тахминан 2400 гектардай саки 52 агъзур тонн вахчунвайдакай раижнай. Чешмеди къейд­завайвал, буранрин бегьер кIватI хъу­вунал гьалтайла, кIвенкIвечи чкайрал Къизляр, Ногъай, Бабаюрт ва Хасавюрт районар ала.

КIвалахар кьиле физва

Хасавюртдилай элячIна фидай 21 километрдин рехъ тухун давам жезва. Идакай Федеральный рекьерин агентстводин официальный телеграм-каналди хабар гузва.

Р-217 «Кавказ» участокда кIвалахар кьиле физва. Чешмеди раижзавайвал­ 2028-йисан эхирра вахкун фикирда ­кьун­вай и объект кардик кутурла, Хасав­юрт шегьердин къенепад артухан улакьрикай азад жеда. Алай вахтунда объект­дин ­гьазурвал 27 процентдилай артух хьанва.

Гьазурайди — Муса  Агьмедов