Алай йисан 1-сентябрдилай къуватда гьатнавай РФ-дин Гьукуматдин 826-нумрадин къарар чилин участокар ишлемиш тийизвайвилин лишанар тайинарунихъ галаз алакъалу я.
Къарардал асаслу яз, чил ишлемиш тийизвайди яз тестикь хьайидалай кьулухъ жедай судуррик административный жермеяр акатзава, эгер иесиди къанун чIурзавай рехнеяр арадай акъуд тавуртIа, чилин участок вахчун ва гуьгъуьнлай ачух савдадин жуьреда маса гун мумкин я.
Чилер ишлемиш тийизвайвилин асас лишанар ихьтинбур я:
— багъдин, салан ва кIвалин патав гвай чилин 50 процентдилай гзаф пай вижесуз куьгьне затIари, зирзибилри ва я метрдилай кьакьанвал аваз экъечIнавай эчIелри кьунваз хьун (ихьтин чIуру гьал тестикьарун патал чил иесидин кIвачихъ ягъайдалай кьулухъ 3 йис вахт алатнаваз хьун гьисаба кьазва);
— ИЖС-дин (индивидуальное жилищное строительство) чилер: мулкунин чIехи пай зирзибилри кьун, дарамат чкIанвайди хьун, кIвал эхиримжи 7 йисуз эцигнавачирди хьун;
— капитальный объектрин участокар: вижесуз затIари кьунваз хьун, эцигнавай чкаяр чIуру гьалда аваз хьун, 5 йисан къене дарамат авачиз хьун.
МФЦ-дин пешекарри гъавурда твазвайвал, цIийи къарардин патахъай жавабдарвал ва гуьзчивал тухун Росреестрдин ва чкадин самоуправленидин органрин хиве ава.
Чилин сагьибди къанун чIурзавай нукьсанар тайинарнавай вахтунда арадай акъуд тавуртIа, государстводин гьукумдин органри чилин участок вахчун мумкин я. Ачух савдадин тегьерда маса гайи участокдихъ хьайи къазанжи, хьайи харжияр хкуд хъувуна, сагьибдив вахкузва.
РикIел хуьн важиблу я хьи, чилин участокдихъ галаз алакъалу чIуру гьалар винел акъатайла, сад лагьай сеферда сагьиб тагькимарзава. Жазадин серенжемрик акат тавун патал чилин иесивал жува авун ва я кирида вугун, гьакIни пудратчияр желб авун теклифзава.
Авай чкадилай аслу тушиз
Махачкъалада авай кьилин МФЦ-дин пешекарри хабар гайивал, агьали вич авай, яшамиш жезвай чкадилай аслу тушиз, гьар гьи МФЦ-дин идарада хьайитIани кьилиз акъудиз жедай къуллугъар ава. Ихьтин къуллугъриз экстерриториальный къуллугъар лугьузва.
Абурук акатзава:
— юзан тийидай объект кIвачихъ ягъун;
— РФ-да кардик квай государстводин информацийрин ЕСИА (единая система идентификации и аутентификации) системада «учетный запись» тестикьарун;
— госкъуллугърин хсуси кабинетдиз хтанвай гьазуран нетижаяр вахкун;
— СНИЛС гунин къуллугъ;
— РФ-дин ватандашдин паспорт къачун.
«Лезги газет»
