21-сентябрдиз республикадин цIийи тарихда сад лагьай сефер яз кьиле тухузвай Дагъустандин халкьарин спартакиада ачухуниз талукьарнавай шад мярекат кьиле фена. «Труд» стадиондал машгьур спортсменар, СВО-дин иштиракчияр, гьукумдин органрин векилар, меркезвияр, гьакI чпин командайрин руьгь хкажун патал республикадин жуьреба-жуьре районрайни шегьеррай атанвай агьалияр кIватI хьанвай, са гафуналди, стадион инсанрив ацIанвай. Виликдай хъсан адет тир и серенжемдал чан хкунин теклиф гайиди Дагъустандин Гьукуматдин Председатель А. Абдулмуслимов я.
Шад мярекатдин сергьятра аваз, стадиондал жуьреба-жуьре йисара Олимпиададин къугъунра гъалибвилер къазанмишай спортсменрин парад кьиле фена. КIватI хьанвайбуру М. Арацилов, Н. Шанавазов, С. Абсаидов, Гь. Гьайдарбегов, Ш. Шарипов (чи миллетдин векилрикай абурун арада анжах са Жавид Гьамзатов авай) ва масабур, кIвачел къарагъна, гурлу капар ягъуналди, къаршиламишна. Гуьгъуьналлаз спартакиададин иштиракчийрин — Дагъустандин вири муниципалитетрин хкянавай командайрин — парад кьиле фена, абуру майдандал чка кьуна.
Спартакиададин иштиракчийриз ва мугьманриз Дагъустандин Кьил С. Меликован тIварунихъай А. Абдулмуслимова чими саламар лагьана, вишелай виниз халкьар дуствилелди яшамиш жезвай республикадин баркаван чилел кьиле физвай спортдин сувар тебрикна.
А. Абдулмуслимова Дагъларин уьлкве спортдин хъсан адетралди датIана машгьур хьайиди, Россиядин регионрин арада ва дуьньяда спортдин башчийрикай сад яз гьахълудаказ гьисабзавайди къейдна.
— Чи чилел машгьур спортсменрин ва тренеррин садни кьве несил чIехи хьанвач. Йисалай-суз чи атлетри мадни кьакьан кукIушар муьтIуьгъарзава. Республикада спортдин виниз тир дережадин акъажунар кьиле тухун, физкультурадал, спортдал машгъул хьун патал лазим тир вири шартIар тешкилнава. Дагъустанвийриз спорт гзаф кIанда, адакай чи халкьарин кьетIен культурадин пай хьанва, — лагьана ада.
Премьер-министрди виликдай Дагъустандин халкьарин спартакиада неинки спортдин зурба вакъиа хьайиди, гьакI республикадин вишералди спортсменар санал кIватIзавай халис сувариз элкъвейдини рикIел хкана. 1956-йисуз сифте сефер яз кьиле тухвай РСФСР-дин халкьарин спартакиададин хьиз, региондин паюнин макьсадни массовый спорт ва физический культура вилик тухун, халкьарин арада дуствал мягькемарун, бажарагълу спортсменар майдандиз акъудун, сагълам уьмуьр кечирмишун, советрин спортдин агалкьунар къалурун тирди къейд авунихъ галаз сад хьиз, къенин юкъуз чун и хъсан адет кутун хъувунал хквезвайди раижна. Ада тренерриз, тешкилатчийриз, волонтерриз ва спартакиададик пай кутур вирибуруз сагърай лагьана. Адан иштиракчийрихъни агалкьунар хьун алхишна.
Мярекатдал Махачкъаладин мэрдин везифаяр вахтуналди тамамарзавай Жамбулат Салавов, Россиядин Игит Энвер Набиев, Олимпиададин чемпион М.-Гь. Абушев ва масабур рахана. Абуру спартакиада неинки спортдин, гьакI гзаф миллетар санал яшамиш жезвай республикадин садвал ва дуствал къалурзавай лишан тирди къейдна.
Гимнияр тамамаруникди СВО-дин иштиракчийри Россиядин ва Дагъустандин пайдахар хкажна. Шад мярекат кьуьлердайбурун «Лезгинка», «Молодость Дагестана», «Дагъустан» ансамблри ва концертдин программадин маса нумрайри, спартакиададин гимн тамамаруни мадни гурлу ва яргъалди рикIера амукьдайдаз элкъуьрна.
Спартакиада ЧIехи Гъалибвилин 80 йис тамам хьуниз, Ватан хуьдайбурун йисаз ва Дагъустандин халкьарин садвилин йикъаз талукьарнава. И серенжемди викIегьбур майдандиз акъудуниз, санлай спорт ва физический культура авай гьалдиз къимет гуниз куьмекда. Спартакиададин программадик спортдин 16 (азаддаказ кьуршахар кьун, бокс, дзюдо, волейбол, тхэквондо, мини-футбол ва мсб.) жуьредай акъажунар квай. ИкI, Каспийскда, Али Алиеван тIварунихъ галай спорткомплексда, жуьреба-жуьре йикъара кьиле фейи акъажунра спортсменри чпин алакьунар къалурна. Кьилди къачуртIа, чи ватанэгьлийрикай ана азаддаказ кьуршахар кьунай Осман Султанова (61 кг), Агъаширин Агъаширинова, Шамсудин Бабаева (кьведани 57 кг-дин заланвал авайбурун арада) приздин чкаяр кьуна.
Рагнеда Рамалданова
