Сергей Меликован Указдалди (141-нумра, 2025-йисан 11-сентябрь) Каспийск шегьерда авай Республикадин образованидин центр ДАССР-дин лайихлу муаллим, Дагъларин уьлкведин образование вилик тухуник еке пай кутур Исамудин Играмудинович Ханбалаеван тIварцIихъ янава.
Бинеяр СтIал Сулейманан райондин Бутхуьряй тир Исамудин Ханбалаев Дагъустандин образованидин уьмуьрда аквадай хьтин гел тунвай кьегьал рухвайрикай сад я. 1952-йисуз Кьасумхуьруьн юкьван мектеб къизилдин медалдалди акьалтIарай ам машгьур МГУ-дик акатна. А девирда къизилдин медалар гвай выпускникар и университетдиз имтигьанар галачиз кьабулзавай. Гьеле мектебда кIелзавай йисарилай физикадал рикI алай жегьилди гьа и предметдиз талукь факультетни хкяна. Амма МГУ-дин кьилевайбуру рикIе чIехи къастар авай дагъвидиз Дагъустанда геологар кьит тирвиляй геологиядин факультетда чирвилер къачун теклифна. Исамудин Ханбалаеван фикир лагьайтIа, масад тир. Вичин мукьва-кьилийрихъ галаз меслятар авурдалай кьулухъ ам Дагъустандин пединститутдин физикадин факультетдик экечIна. Инаг яру дипломдалди куьтягьай жегьил пешекарди муаллимвилин рехъ вичи кIелай Кьасумхуьруьн юкьван мектебда кIвалахунилай гатIунна.
Гуьгъуьнлай Исамудин Ханбалаева жуьреба-жуьре йисара Дагъустандин муаллимрин пешекарвал хкаждай институтда кабинетдин заведующийвиле, директордин заместителвиле кIвалахна. 1990-йисуз ада Москва шегьерда тарихдин илимрин кандидатвилин диссертация агалкьунралди хвена. Алакьунар авай тешкилатчи 1973-йисуз ДАССР-дин просвещенидин министрдин заместителвиле тайинарна. Идалай кьулухъ ада Тахо-Годидин тIварцIихъ галай педагогикадин илимдинни ахтармишунрин институтдин директордин заместителдин везифаяр тамамарна. Вичин уьмуьрда гьина кIвалахнатIани, Исамудин Играмудиновича вич кар алакьдай регьбер, гъавурда авай пешекар яз къалурна, санал кIвалахай юлдашрин арада чIехи кесер къазанмишна. Хейлин йисара образованидин хиле бегьерлудаказ зегьмет чIугунай адаз «Знак почета» орден ганай. Ам 1992-йисуз 56 йисан яшда аваз рагьметдиз фена.
Исамудин Играмудиновича вичин уьмуьрдин юлдаш Роза Мегьамеднабиевнадихъ галаз чешнелу хизан арадал гъана. Абурун веледри алай вахтунда, чпиз бубади гайи камаллу насигьатрал амал ийиз, халкьдин майишатдин жуьреба-жуьре хилера гьакъисагъвилелди зегьмет чIугвазва. Дагъустандин Кьилин Указдалди ихьтин кьегьал хцин экуь къамат эбеди авун лайихлу ва кутугай кар хьана.
Чи мухбир
