Гьар йисан 22-сентябрдиз Россиядин ФСИН-дин (Федеральная служба исполнения наказаний) УИС-дин (уголовно-исполнительная система) кIвалахдин рекьяй везифаяр тамамардайла, телеф хьайи къуллугъчийрин югъ къейдзава.
Адан сергьятра аваз, Россиядин Дагъустанда авай УФСИН-дин 2-нумрадин СИЗО-дин къуллугъчийри Дербентдин В.А. Эмирован тIварунихъ галай кадетрин корпусда тербия къачузвай аялар патал ватанпересвилинни жуьрэтлувилин тарс тухвана. Гуьруьш 2-нумрадин СИЗО-дин начальникдин заместитель, къенепатан къуллугъдин майор Борис Келбиханова ачухна.
— Уьмуьрда ватанпересвилин пак гьисс неинки женгинин майданра, гьакIни гьар йикъан кIвалахда, къуллугъда къалурунни лазим жезва. Чахъ галаз санал зегьмет чIугур юлдашри къуллугъдин ва пешекарвилин рекьяй везифаяр, чпин чанарилайни гъил къачуна, намуслудаказ кьилиз акъудна. Шаксуз, чун ва гележегдин несилар патал абур журэтлувилин чешнеяр яз амукьда. Абурун экуь къаматри чи рикIера, къуллугъдин тарихда гьамишалугъ чка кьунва, — къейдна ада.
Кадетриз УИС-дин тарихдикай, къуллугъчийрин кьегьалвилерикай, пешедиз талукь яз авай адетрикай ва санлай кьилиз акъудзавай везифайрикайни суьгьбетна. Аялрин суалриз пешекарри маналу жавабар гана.
Кадетрин корпусдин тербиячи Мегьрибан Коньшинади акьалтзавай несилдиз ватанпересвилин тербия гунай мугьманриз сагърай лагьана, ихьтин серенжемри абурун рикIера дерин гел тазвайди, игитар рикIел хуьнин важиблувал аннамишиз куьмекзавайди къейдна.
Чи мухбир
