Мегьарамдхуьруьн районда, милли «Самурский» паркуна, «Природа и люди» фондуни чIурун кацерин тек-туьк гьалтзавай жуьреяр хуьн патал экологиядин проект кьилиз акъудзава. Ихтилат Кавказдин тамун ва нацIун кацерикай физва. Абур Самурдин тама яшамиш жезва.
Мегьарамдхуьруьн райондин администрациядин пресс-къуллугъди хабар гузвайвал, проект кьилиз акъудунин карда «Магнит» карханади куьмекзава. «Природа и люди» фондунин векил Ирина Воробьевадин фикирдалди, и кацерин кьадар артухардай серенжемар вахтунда кьабул ва къулай шартIар тешкил тавуртIа, абур михьиз терг хьун мумкин я. Пешекарри тамун ва нацIун кацерин яшайишдин кьетIенвилер гьихьтинбур ятIа чирда, абур Кавказдин, Предкавказьедин ва Прикаспийдин гьи мулкара аватIа тайинарда.
И йикъара проект кьилиз акъудзавай пешекарар Мегьарамдхуьруьн райондиз мугьман хьанвай. Абуру «Самурский» паркунин тайин мулкара чинеба шикилар ядай алатар кардик кутунва ва гуьзчивал тухудай чкаяр туькIуьрнава.
Чи мухбир
