Блогерар, студентар, жегьил авторар ва журналистар патал

милли «МедиаПоле» премия тешкилнава

РФ-дин хуьруьн майишатдин министерст­води, «Хуьрерин мулкар тамамдаказ еримлу авун» гос­программа кьилиз акъу­ду­нин­ сергьятра аваз, милли «МедиаПоле» премия тайинарнавайдакай хабар гузва. Адан асул макьсад шегьердилай къерехда авай мулкара яшамиш жезвай агьалийрин уьмуьр­дин шартIар ва зегьмет хуш гьалара­ къалурунин кар машгьурун, агропромышленностдин комплекс, агро­ту­ризм ва экологиядиз талукь крар еримлу авун я.

Милли премия къачун патал 18 йисалай виниз яшара авай Россиядин ватандашриз иштиракдай мумкинвал ава: блогерриз, студентриз, Россиядин мулкара авай хуьрерин уьмуьрдикай, абурун гьалар еримлу авуникай медиаконтент арадал гъизвай жегьил авторриз ва журналистриз.

Иштиракдай ашкъи авайбурун арзаяр премиядин официальный сайтда (медиаполе.рф) алай йисан 17-октябрдалди кьабулзава.

Къейдзавайвал, ноябрдин эхирра финалдиз акъа­тай 100 кас Москвадиз фида ва абур уьлкведин чIехи медиацентрайриз килигда. Идалайни гъейри, финалистри карчивилин гегьенш программада иштиракда. Кьилди къачуртIа, иштиракчийриз кьве йикъан къене экспертри, машгьур блогерри мастер-классар къалурда. ГьакIни лап хъсан проектрин авторрив шад гьалара шабагьар вахкуда.

Пишкешрин фонд 4 миллионни 500 агъзур манатдикай ибарат я.

Чи мухбир