Акьалтзавай несил ва жегьилар чIуру крарикай, амалрикай хуьн патал республикада талукь органри датIана зегьмет чIугвазва. Ингье и йикъара РД-дин Гьукуматдин Председателдин замес­титель Рамазан Жафарован регьбервилик кваз наркотикриз акси кIвалах тухудай комиссиядин заседание кьиле фена. Ана къайдаяр хуьдай органрин, министерствойрин, ведомствойрин регьберри, муниципалитет­рин кьилери ва жемиятдин тешкилатрин векилри иштиракна. 

Мярекатдал наркотикар ишле­мишунихъ галаз алакъалу медицинадин, автотранспортдин хиле­риз ва  водителриз талукь месэ­лаяр веревирдна. Кьилин фикир, талукь ведомствойри санал кIва­лахуналди, автотранспорт гьал­за­вай ва наркотикар ишлемишзавай ксар фад дуьздал акъудуниз гана кIанзавайдакай лагьана.

Рамазан Жафарова къейдна­ хьи, наркотикар ишлемишунин­ не­ти­жаяр хъсанбур тежезвайдакай­ инсанар хабардар авунихъ ва профилактикадин серенжемар­ датIа­на тухунихъ еке метлеб­ жеда. Наркотикрин дад акунвай­бур­, пиянбур машиндин рулдихъ­ ацукьарна кIандач. Ахьтинбур дуьздал акъудун герек я. ГьикI лагьайтIа, абуру рекьера хатасузвилер арадал гъизва.

— Рекьера хаталу дуьшуьшар хьайила, водителар медицинадин рекьяй вахтунда ахтармиш тавун лап хци месэлайрикай сад я, — лагьана вице-премьерди. — Медици­надин идарайрани наркотикар иш­лемишнавайбур, пиянбур тайинарзавай сад хьтин къайдайрикай менфят къачузвач. Гьар са идарадихъ вичин къайдаяр ава. ИкI хьун лазим туш.

Важиблу и месэладиз талукь кIва­лах тешкилнавай гьалдикай РД-дин здравоохраненидин министр Ярослав Глазова гегьеншдиз суьгьбетна. Ада къейд авурвал, медицинадин рекьяй тайин къимет гун патал водителар идара­диз хкизвай вахт тIимиларун къайдаяр хуьдай органри ва меди­цинадин идарайри санал кIва­ла­хунилай аслу жеда. Идахъ галаз сад хьиз, лабораторийра тухузвай ахармишунрин кIвалахни гегьеншарун, меди­цинадин къуллугъчий­рин право­вой чирвилер, вердишвилер артухарун­, алай аямдин тех­но­логийрикай мен­фят къачун герек я. Ихьтин серенжемар кьиле ту­хуни рекьера хаталу дуьшуьшар арадал гъизвай наркотикрик пиянбур фад тайинардай мумкинвал гуда.

Жегьил несил наркотикрикай­ хуьнин гьакъиндай чпи тухузвай кIва­­лахдикай РД-дин милли сия­сат­дин ва динрин крарин, физкуль­турадинни спортдин минис­терст­войрин, къайдаяр хуьдай органрин ва муфтиятдин векилри лагьана.

Виридахъ яб акалайдалай гуьгъуьниз Рамазан Жафарова талукь идарайрал наркотикрик пиянбурал гуьзчивалдай къурулуш авайдалай хъсанардай ва наркотикрихъ галаз алакъалу тахсиркарвилерай жавабдарвал артухардай серенжемар кьабулун тапшурмишна.

Абад Азадов