Алай йисан 20-сентябрдиз Хив дередин хуьрера райондин 90 йис тамам хьунихъ галаз алакъалу шад, чIехи мярекатар кьиле фена. Райцентрада тешкилнавай мярекатдиз гзаф инсанар кIватI хьанвай. Абурун арада республикадин гьукумдин органрин, яратмишдай ва илимдин интеллигенциядин, жемиятдин векилар, гьакIни къунши районрин кьилер, зегьметчияр, отпускдиз хтанвай махсус серенжемдин иштиракчияр авай.
Багьа мугьманрин арада Дагъустан Республикадин Гьукуматдин Председателдин заместитель Нариман Абдулмуталибов, РД-дин Халкьдин Собранида Дагъустандин Кьилин гьакъикъи векил Нуьсрет Омаров, РД-дин ГО-дин, ЧС-дин крарин рекьяй ва тIебиатдин бедбахтвилер алуддай министрдин заместитель Надим Велиханов, РД-дин хуьруьн майишатдин ва суьрсетдин министрдин заместитель Хирамегьамед Муртазалиев, РД-дин Халкьдин Собранидин депутат Алаудин Мирзабалаев, ДФО-да РД-дин Гьамишалугъ векил Бейдуллагь Исаев, Дагъустандин Огни шегьердин администрациядин Кьил Замир Гьажимурадов, республикадин образованидин центрадин директор Анжела Байрамбегова ва масабур авай.
Райондин гьакимри ва агьалийри Хив райондин сергьятдал багьа мугьманар шад гьалара кьабулна. Ахпа абуру ЦIинитIрин хуьре спортдин майдан ачухунин карда иштиракна ва школьникрин арада мини-футболдай кьиле фейи турнирдиз килигна. Спортдин майдан республикадин «Хуьрерин мулкар комплекснидаказ вилик тухун» госпрограммадин сергьятра аваз туькIуьрнава. Ам РД-дин ГКУ-дин иштираквал аваз эцигнава ва футболдай турнирар тухудай вири жуьредин тадаракралди таъминарнава.
Райондин школайрин арада кьиле фейи турнирда хейлин командайри иштиракна. Гъалибчияр ва лап хъсандиз къугъвай футболистар призралди, грамотайралди ва кубокралди къейдна. И шад ва разивалдай серенжемда Нариман Абдулмуталибовани иштиракна, ада турнирдин иштиракчийриз спортда мадни еке агалкьунар къазанмишун алхишна.
Райондин агьалияр ва мугьманар Ватандин ЧIехи дяведа телеф хьайи аскерриз хкажнавай мемориалдин комплексдал фена, анал шад гьалара цуьквер эцигна. Абур Агъа АрхитIа викIегь аскерриз эцигнавай памятникдин вилик са декьикьада кисна акъвазна. РД-дин лайихлу муаллим ва писатель Атам Бабаева вичин рахунра Ватандин ЧIехи дяведа гъалибвал къазанмишай кьегьалрин лайихлувилер рикIел хкана.
АрхитIрин юкьван школадин ученикри ватанпересвилин шиирар кIелна, манияр лагьана. Райондин культурадин имаратдин гьаятда хуьрери кьилди-кьилдин майданар ачухнавай. Зегьметчийри къурмишнавай суфрайрал Кьиблепатан Дагъустандин агьалийри гьазурзавай жуьреба-жуьре хуьрекар, ширинлухар, багъларинни саларин няметар алай. Гьар са майдандал хуьрерин агьалийри мугьманар хушвилелди кьабулзавай, чпи гьазурнавай няметар теклифзавай. Гьар сада райондин агалкьунрал дамахзавайди ва шадвалзавайди аквазвай.
Юбилейдин мярекатдик кIватI хьанвайбур Хив райондин администрациядин кьил Ярмет Ярметова тебрикна:
— Гьуьрметлу ватанэгьлияр! За квез райондин 90 йисан баркаллу юбилей рикIин сидкьидай мубаракзава.
Гъилевай йис Ватан хуьзвайбурунди, чна Ватандин ЧIехи дяведа Гитлеран чапхунчийрал гъалибвал къазанмишайди я. Чна ихьтин крарал, район вири рекьерай вилик фин патал зегьмет чIугвазвай инсанрал дамахзава.
Чаз алай вахтунда дяведин махсус серенжемда Ватандин итижар хуьзвай гьар са аскер багьа я. Абурухъ чпин вилик эцигзавай четин ва важиблу везифаяр кьилиз акъуддай къуватар хьурай! Гъалибвал къачуна, сагъ-саламатдиз хтурай.
Россиядин Игит Эседулла Абдулмуминович Абачев фад сагъ хъхьун чи мурад я.
Эхиримжи йисара районда хъсан патахъ дегишвилер, агьалийрин гьал-агьвал хкаж жезва. Чаз вири рекьерай куьмекзавай Дагъустан Республикадин Кьил Сергей Алимович Меликоваз, РД-дин Халкьдин Собранидиз, Гьукуматдиз сагърай лугьуз кIанзава.
За къе чи райондин гьар са агьалидиз баркалла лугьузва. Абуру район абад авун патал еке зегьмет чIугвазва.
Ярмет Ярметова эхиримжи йисара районди къазанмишнавай агалкьунрикай, адан тарихдикай ва гележегдин мурадрикай ихтилат давамарна.
Хив райондин 90 йис тамам хьунихъ галаз алакъалу яз чкадин самоуправленидин органрин хейлин работникар ведомствойрин шабагьралди къейдна. Эхирдай кIватI хьанвайбуруз республикадин искусстводин устадри, художественный самодеятельностдин коллективри еке концерт гана.
Хийир Эмиров
