Виш йисар идалай вилик кьиле фейи вакъиайри успатзавайвал, кIеве гьатай, къурхувилик акатзавай вахтунда халкьди вичин садвал, тупламишвал къалурзава. Къени гьакI я. Украинадин миллетбазри амалзавай Россиядиз акси сиясат себеб яз, Донбассдин чилер ва халкь нацистрикай азаддай дяведин серенжем давам жезва. РФ-дин Яракьлу Къуватриз вири халкьдини куьмек гузва. Дагъустанни кьулухъ акъваззавач.

И мукьвара Дагъустандин делегация­ Запорожьедин областдиз фена, аниз 5 тонн пар тухвана. Аник квадрокоптерар, ноутбукар, камераяр, душмандикай хуьдай мас­ка-сетар, эцигунардай материалар, хъвадай яд, хуьруьн майишатдин няметар ва «Хендай» маркадин автомашин квай.

Батальондин «Топаз» лакIаб алай командирди Дагъустандин делегациядиз ри­кIин сидкьидай сагърай лагьана: «Сенгеррал алай чна гьамиша куь патай къайгъударвал гьиссзава. Хизанрин, багърийрин яшайиш пайгардик квайвиляй чна вилик акъвазнавай везифаярни секиндиз кьилиз акъудзава»,- лагьана ада.

Росреестрдин Дагъустандин управлениди­ «Вири — Гъалибвал патал» проектдин сергьятра аваз, дяведин махсус серенжемда авайбуруз кьуд «Нива» автомашин рекье ту­на. Управленидин начальник Арсен Пирмегьа­медова лагьайвал, автомашинар Запорожье­дин областда авай мотострелковый­ 503-полкунив агакьнава. Идалай виликни уп­равле­ниди СВО-диз кьве машин рекье турди я.

Абад  Азадов