Мукьвара Ахцегь райондин Смугъулрин школада жуьрэтлувилин ачух тарс кьиле фена. Ватан хуьзвайбурун йисан ва Ватандин ЧIехи дяведин 80 йисан юбилейдин лишандик кваз тешкилай ватанпересвилин мярекатдал рухсатдиз хтанвай СВО-дин иштиракчи, Смугъулрин школадин муаллим Рагьим Исакьоваз теклифнавай. Ачух тарсуна школадин чIехи классрин аялри ва муаллимри иштиракна. Мярекат, вичин сифте гафуна СВО-да игитвилелди телеф хьайи смугъулви жегьил офицер Араз Агъакишиев рикIел хкуналди (тарс «Жуьрэтлувиляй» ордендин сагьиб Араза кIелай классда хьана), школадин директор Сейфуллагь Назарова ачухна.
— Кьуру гафаралди ваъ, хсуси чешнедалди аялриз ватанпересвилин тербия гузвай, гъиле яракь аваз, игитвилелди душмандин хура акъвазнавай Рагьим муаллим Смугъулрин школадин, хуьруьн, райондин дамах я. ГьикI хьи, райондин саки 900 муаллимдикай анжах ам, кIвалах ва кIвале жегьил хизан туна, мобилизациядик экечIна, 2022-йисан сентябрдилай нацистрин аксина Ватан хуьнин женгина ава, — лагьана директорди.
— Ватан хуьн гьар са итимдин эвелимжи буржи я кьван, — лагьана Рагьим Исакьова. — Донбассдин чилел дяве башламишна, мобилизациядин повестка атайла, гьелбетда, парабурувай хьиз, завайни кьил къакъуднайтIа, жедай. Амма ахьтин фикир гьич кьилизни атанач. Жуван имидин хва Исакьов МутIалибахъ галаз санал дяведиз фена чун (эхиримжи 2-3 вацра адакай ван-сес авач). Вучиз лагьайтIа, чи дяве гьахъ паталди, уьлкведин азадвални аслу туширвал паталди тирди чаз чизва. Ватандин винел яракьламиш хьанвай душман атайла, чанни къурбандна, ам чна хуьн тавуртIа, ни хуьда? Сифтедай 6 вацран вахтуналди фейи зун гуьгъуьнлай, женгинин дустар таз тахьана, ингье ана аваз 3 йис хьанва. Алай вахтунда, Буйнакскдин мотострелковый 136-бригададик кваз, «Д-30» тупунин расчётдин командир я, — лугьузва аскерди.
Суьгьбетдин вахтунда Рагьима аялрин фикир дяведа женгинин дустарихъ галаз авай хъсан рафтарвилерин, четин шартIара дуствилин, ватанпересвилин, сада-садаз куьмекунин ва маса месэлайрал желбна. Аялризни муаллимриз чпин аскер муаллимдин женгинин уьмуьр акьван итижлу тир хьи, абуру гьар жуьредин суалар гузвай: яракьрал, тIуьн-хъунрал таъминвилин, руьгьдин гьалдин, женгерин агалкьунрин, шабагьрин ва икI мад. Рагьима абуруз рази жедай кутугай жавабар гана.
Къейд ийин хьи, Рагьим Исакьович «Дирибашвиляй» II дережадин, «Гьунарлувиляй» ва женгинин маса медалриз лайихлу хьанва. 2023-йисан ноябрдиз Запорожьедин областдин Работино хуьруьн патав Рагьиман «Д-30» тупунин расчётди душмандин танк яна, са ротадилай гзаф аскерар тергна. КьетIи женгинай генералди адаз чухсагъул малумарна, Рагьим «Жуьрэтлувиляй» орден гуниз къалурна. Амма, вучиз ятIани, и чIехи шабагь иесидив къени агакьнавач. Гьа женгина тупунин расчётдин командир Рагьиман къуьнел хьайи херни тамамдиз сагъ хъхьанвач: БПЛА хъиткьинна, акIай ракьун кIус, ахкъудиз тахьана, ама.
Рагьим Исакьова вичин суьгьбет аялриз насигьатдин гафаралди бегьемарна: «Гьуьрметлу аялар, къе чна душмандихъ галаз хайи Ватан хуьн патал, куь хушбахт гележег патал женг чIугвазва. Куь везифа ватандиз, хайи халкьдиз вафалу халис инсанар хьун патал диде-бубайривайни муаллимривай хъсан тербия ва чирвал къачун я. Пака куьн я чи уьлкведин сагьибар».
Эхирдай школадин директор Сейфуллагь Назарова викIегь аскердиз муаллимринни аялрин патай тербиядин манадин хъсан суьгьбет авунай ва Ватан хуьнай чухсагъул лагьана. Аялри адан къужах гьуьрметдивди цуькверив ацIурна.
Дашдемир Шерифалиев
