Рахунриз талукь шартI
Кеферпатан Кореядин регьбер Ким Чен Ына США-дихъ галаз рахунар кьиле тухудай шартI малумарнава. Идакай «Лента.ру» чешмеди хабар гузва. «Эгер США-ди маса уьлквейри ядерный яракьар тIимиларунин жигьетдай манасуз алахъунар акъвазарайтIа ва, гьакъикъи гьалар аннамишна, чахъ галаз халисан ислягьвилин меслятдал къвез кIан хьайитIа, и кар, чин-чинал акъвазна, веревирд тавунихъ чаз себебни авач», — лагьанва КНДР-дин регьберди.
Адан гафаралди, США кьиле аваз, РагъакIидай патаз гьелягьринни санкцийрин куьмекдалди Пхеньян «метIерал акъвазариз» кIанзава, амма абур и жигьетдай дериндай гъалатI я.
Гьамиша куьмекиз жедач
Туьркиядин президент Р.Т. Эрдоганан фикирдалди, Киевди чпиз гьамиша куьмек гуник умуд кутун дуьз туш. «За Европадивай Украинадиз экономикадин рекьяй гьамиша куьмек гуз жеда лагьана фикирзавач», — Эрдоганан гафар «РИА Новости» чешмеди малумарна.
Ада алава хъувурвал, Украинадивай Россиядихъ галаз экономикадин рекьяй бягьс чIугваз жедач.
Дурум гузва
США-дин регьбер Дональд Трампа Россиядиз акси цIийи санкцияр бажагьат малумарда. Украинадин виликан чиновникдин гафар «Рейтер» чешмеда чапнава. «Адан фикирдалди, Трампак умуд кутун тавуна, Украинади вичин кьушунар артухаруникай, къуватлу авуникай фикирун герек я», — лагьанва малуматда.
РФ-дин гьукумдарри гзаф сеферра малумарнай хьи, са шумуд йис идалай вилик РагъакIидай пата Россиядиз акси яз башламишай ва исятдани давамарзавай санкцийриз уьлкведи дурум гуда. РФ-диз акси яз малумарай санкцийрихъ РагъакIидай пата вилив хвейи нетижаяр хьанач, и кар кьатIунун патал европавийриз жуьрэтлувал бес жезвач.
Меслятдалди акьалтIна кIанзава
Къазахстандин президент Кьасым-Жомарт Токаева Владимир Зеленскийдихъ галаз кьиле фейи гуьруьшдал Украинадин къалмакъал меслятдин рахунар давамаруналди арадай акъудуникай ихтилатна. Идакай Къазахстандин регьбердин телеграм-каналда кхьенва.
«В. Зеленскийди Украинадин гьалдиз талукь яз вичин фикир лагьана. Къазахстандин президентди исятда авай гьал лап четинди, къалмакъал акъвазарунин рекьер жагъурунин макьсаддалди дипломатвилин кIвалахар давамарун герек тирди къейдна», — кхьенва пресс-къуллугъдин малуматда.
Къейд ийин, гуьруьш ООН-дин Генеральный Ассамблеядин 80 лагьай сессиядин сергьятра аваз кьиле фена.
21 дрон тергна
23-сентябрдин экуьнахъ «РИА Новости» чешмеди хабар гайивал, йифен вахтунда ПВО-дин къуватри Украинади Москвадихъ ахъаяй 21 беспилотник яна.
Санлай къачурла, са йифиз Россиядин регионрихъ ВСУ-ди ахъаяй 69 беспилотник тергна. Кьилди къачуртIа, Белгороддин, Брянскдин, Курскдин, Калугадин, Москвадин, Ростовдин, Рязандин, Самарадин, Саратовдин областрал ва Крымдал гьужумнавай.
Малумарзавайвал, ВСУ-ди гьар юкъуз Россиядин дяведиз талукь тушир объектар дронрай ягъунин алахъунар ийизва. Жаваб яз, чи уьлкведин армияди макьсаддив дуьм-дуьз агакьардай гьар жуьредин яракьралди, дронралда Украинадин анжах военный объектар, дявединни промышленностдин комплексдин карханаяр язава.
Гьазурайди — К. Ферзалиев
