11-октябрдиз Махачкъалада, тарихдин «Россия — моя история» паркуна, ругуд лагьай сеферда международный дережада аваз «Лезги диктант» кьиле фида. ЦIи и чIехи мярекат Дагъустандин эдебиятдин классик Етим Эминан 185 йисан юбилейдиз талукьарнава.
«Лезги диктантдин» сергьятра аваз, лезги халкьдин медениятдиз, тIуьнриз, хайи чIалал акъатнавай ктабриз талукьарнавай выставкаяр тешкилда, ДГУ-да ва ДГПУ-да вири вадар аваз кIелзавай студентрив — стипендияр, Махачкъаладин ва Каспийскдин мектебра кIвалахзавай лезги чIалан са шумуд муаллимдив, шаз диктант «5» къиметдалди кхьейбурув пулдин пишкешар вахкуда, иштиракчийрин арада жуьреба-жуьре савкьатар къугъвада, Етим Эминан уьмуьрдиз ва эсерриз талукь суалрин викторина кьиле тухуда.
Къейд ийин хьи, «Лезги диктантда», чкадал атана, иштиракдай мумкинвал авачирбурувай диктант, вилик йисара хьиз, онлайн-къайдада кхьиз жеда. И кар авун патал сифте нубатда «Лезги диктантдин» сайтда регистрация авун кьилин шартI я. 11-октябрдиз и сайтдин кьилин чина авай «Написать диктант» разделдиз гьахьна кIанда. Идалай кьулухъ онлайн-къайдада диктант кхьидай мумкинвал жеда.
«Лезги диктант» нисинин сятдин 2-даз (14:00) гатIунда. Чна вири ватанэгьлийриз диктант кхьина иштиракуниз эвер гузва.
«Лезги газет»
