Эхиримжи йисара, шукур хьурай Аллагьдиз, Лезгистанда вири халкь, кьилдин хуьрерин жемятар патал хийир авай кIвалахар ийизвай, серенжемар кьабулзавай кьегьалрин кьадар гзаф жезва. Са жерге чи ватанэгьлийри мергьяматлувилин фондарни арадал гъанва. Мисал яз: «Леки», «Абад КьепIир», «Мугьаммад-гьажи Хидирован тIварунихъ галай фонд» ва масабур. Абуру тамамарзавай крарикай «Лезги газетди» халкь гьамиша хабардар ийизва.

Мукьвара Сулейман-Стальский райондин администрациядин жегьилрин парламентдин векилрини мергьяматлувилин серенжем кьиле тухвана. Пак Рамазандин вацра са жерге жегьилри хсуси пулдин такьатрихъди Алидхуьруьн 3-нумрадин ясли-бахчада, аялар къугъвадай, машгъулардай тадаракар маса къачуна, кардик кутунва.

Сулейман-Стальский райондин администрациядин жегьилрин парламентдин председателдин заместитель Нажмудин Бабаева хабар гайивал, парламентди мергьяматлувилин крарал жезмай кьван гзаф жегьилар желбзава.

«Чахъ кьве вацра садра райондин са хуьре авачир са булах, спортдин майданар, ясли-бахчайра аялар къугъвадай чкаяр эцигдай, туькIуьрдай къаст ава. Исятда чи вилик Испика спортдин майдан эцигун, КIагъцугърин хуьр патални ихьтин тадаракар къачун акъвазнава. Ихьтин кIвалахар чна инлай кьулухъни давамарда», — лугьузва Н.Бабаева.

Аферин жегьилриз. Лезги халкьдин акьалтзавай несилар дуьз рекьева. И карди чаз лезги халкьдин гележег мадни хъсанди жедайдак умудар кутадай мумкинвал гузва. Къуй чи ватанэгьлийри ийизвай хъсан крар Сад Аллагьди кьабулрай!

[KGVID]https://lezgigazet.ru/wp-content/uploads/2017/06/ZHegilrin-parlamentdin-barkallu-krar..mp4[/KGVID]

«Лезги газет»