22-сентябрдиз Дагъустанда 12-сеферда тешкилнавай диндинни жегьилрин международный дережадин форум гатIунна. 25-сентябрдалди давам жедай ам цIи терроризмдин идеологиядиз аксивалунин месэлайриз талукьарнава.
Форум ачухунин мярекатда РД-дин Гьукуматдин Председатель Абдулмуслим Абдулмуслимовани иштиракна. Ада иштиракчияр, мугьманар РД-дин Кьил Сергей Меликован тIварцIихъай тебрикна ва гьар йисуз тухузвай чIехи мярекатдихъ жуьреба-жуьре халкьарин, динрин векилрин арада дуствал, стхавал мягькемарунин жигьетдай авай важиблувал къейдна.
«Куьн иниз, Дагъларин уьлкведиз, мугьман хьун, неинки цIийи чирвилерин чешме, гьакIни гьар жуьредин медениятрин векилрин рикIер садзавай мягькем муькъверни жеда. Форумдин иштиракчийрин арада гзаф жегьилар хьуни ислягьвални дуствал чи умуми Ватан — Россия дурумлудаказ вилик финин бине хьун герек тирди тестикьарзава», — лагьана премьер-министрди.
«Лезги газет»
