Кар давамарзава

Гьукуматди Дагъустанда, Ингу­шетияда ва Кеферпатан Осетияда ЖКХ-дин ва энергетикадин карханаяр дурумлудаказ вилик тухунин программа уьмуьрдиз кечирмишун патал шартIар арадал гъун да­вамарзава. Идакай РФ-дин Гьукуматдин сайтда хабар гузва.

Чешмеди раижзавайвал, вини­дихъ чпикай ихтилат физвай макьсадар патал 600 миллиондилай гзаф пулдин такьатар ракъурунин буйругъдал къул чIугунва.

РикIел хкин, виликдай чна хабар гайивал, винидихъ тIварар кьунвай чкаяр проект ахтармишунин дережада аваз кьилиз акъудзавай регионар хьанвайбур я. Чешмеди раижзавай делилрай гъавурда акьазвайвал, кабминдин игьти­ят патал хуьзвай фондунай чара авунвай такьатар Дагъустанди, Ингушетияди ва Кеферпатан Осетияди ихьтин программаяр уьмуьрдиз кечирмишунин сергьятра аваз ийиз­вай харжийрик пай кутун яз (софинансирование) герек къведа.

Кьилди къачуртIа, пулунин такьатар агъадихъ галай серенжемар кьиле тухуниз харжда: ЖКХ-дин эменнидин комплексди санал кIвалахдайвал авуниз (и кардал гьар са субъектда арадал гъанвай сад тир операторар машгъул жезва), и хилез хъсан пешекарар желб авуниз; экономикадин жигьетдай бине авай тарифар тайинаруниз.

Гзаф хьанва

Россиядин хуьруьн майишатдин тешкилатри 2025-йисан 8 вацран къене верчерин 26,6 миллиард кака гьасилнава. Йис идалай виликан рекъемдив гекъигайла, им 6,4 процентдин гзаф я. Идакай, Росстатдал асаслу яз, «Интерфакс» изданиди хабар гузва. Кьилди къачуртIа, гьакI августдин вацрани гьасилунин кьадар 6,4 процентдин артух хьанва — 3,4 миллиард уьлчмедал кьван.

Гьа са вахтунда чешмеди къейдзавайвал, муьжуьд вацран къене хуьруьн майишатдин тешкилатри 23,4 миллиард кака маса ганва. Йис идалай виликан ре­къем­див гекъигайла, им 6 процентдин гзаф я. Кьилди къачуртIа, августдиз маса гунин кьадар 6,4 процентдин гзаф хьанва — 3 миллиард уьлчмедал кьван.

Гьа са вахтунда «Агроэксперт» сайтди «Агроэкспорт» федеральный центрадин регьбер Илья Ильюшинан гафарал асаслу яз раижзавайвал, 2025-йисан­ муьжуьд вацран нетижайралди, Россиядай вечрен какаяр экспорт авунин кьадар 12,4 агъзур тонндикай ибарат хьанва. Раижзавай къейдерай гъавурда акьазвайвал­, алатай йисан и муддатдив гекъи­гайла, къецепатаз ракъурнавай и суьрсетдин кьадар 93,3 процентдин, къиметдин жигьетдай 72,4 процентдин гзаф хьанва.

Гьазурайди — Муса Агьмедов