СтIал Сулейманан район хуьруьн майишатдин муниципалитетрик акатзава. Адан хуьруьн майишатдин мулкари санлай 32642 гектар тешкилзава. Идакай 7020 гектар цадай чилер, 6492 гектар багъларни уьзуьмлухар, 3210 гектар векьин уьруьшар ва 16005 гектар мал-лапаг хуьдай чIурар я. Абур вири дигизвай чкайрик акатзава.
Санлай къачурла, дигидай цин къурулуш пис гьалда авач. ЯтIани, ремонтна кIанзавай къаналарни амачиз туш. Октябрдин, ноябрдин варцарилай багъларизни уьзуьмлухриз ятар гудай вахтар алукьда. И кардиз гьазурвал акун яз, районда къаналар ремонт хъувунин, къайдадиз хкунин кIвалахрив эгечIнава.
Райондин хуьруьн майишатдин ва суьрсетдин управленидин начальник Къазиагьмед Къазиагьмедовахъ, адан заместитель Къазиагьмед Абумислимовахъ ва «Дагмелиоводхоз РД» ФГБУ-дин Самур-Гуьргенчайдин филиалдин директордин заместитель Асим Рамазановахъ галаз чун и йикъара «Герейхановский» къанал ремонтзавай Агъа СтIал-Къазмайрин хуьруьн участокдиз фена.
— Къаналдин яргъивал 15 километр я, ада 4 хуьруьн 500 гектардин мулкар дигизва, — лугьузва Къазиагьмед Къазиагьмедова. — Квезни аквазва хьи, къаналдал ремонтрин кIвалахар кьиле тухун тавуна гзаф йисар тир. Нетижада къанал валарини чумурри кьунва, кIане лил ацукьнава. Идалайни гъейри, къаналдин кьве патайни трактор ва маса улакь фидай муьжуьд-муьжуьд метр ачух чка амукьна кIанзавайди я. Гзафбуру и истемишунрал амал ийизвач, гьа амукьна кIанзавай зулар чпин саларик кутан хъийизва, анра къелемар акIурзава. Ихьтин крари къаналар къайдадикай хкудзава. Нетижада карханайрал, суьрсет гьасилзавай агьалийрал герек вахтунда бес кьадар яд агакьзавач. И татугайвилериз чна рехъ гудач, законсуз кьунвай чкаяр ахъай хъийида, къаналар къайдадиз хкида.
Алай йисуз Самур-Гуьргенчайдин филиалдин экскаваторди (шикилда) 8 километрда къанал ремонтна, михьна къайдадиз хканва. И кар давамарни ийизва.
— Икьван чIавалди чи филиалди «Кировский», «Къалагъан-къубу», «Маламишинский» ва «Аламишинский» майишатрин арайринбур тир къаналрин чIуру гьалда авай участокар ремонт хъувуна акьалтIарна, — лугьузва Асим Рамазанова. — «Герейхановский» къанал чна ремонт хъийизвай 5-объект я. Гуьгъуьналлаз амай къаналарни къайдадиз хкида.
Пешекарри чаз лагьайвал, къаналар ремонт хъувунин карда абуруз карханайри, АСП-ри, инвесторри куьмекар гузва. Идай абуруз хуьруьн майишатдин суьрсет гьазурзавайбуру сагърай лугьузва.
Хазран Кьасумов
