Пешекарри гьисабзавайвал, Татархан хуьруьн тIвар татарринни монголрин чапхунчийрин гьужумрихъ галаз алакъалу я. Аквадай гьаларай, и чка татаррин кьушунрин сердер вахтуналди акъвазай чка тир. Гьавиляй аниз гуьгъуьнлай Татархандхуьр лугьуз хьана (яни «татаррин хандин хуьр»).
Хуьр арадал атай дуьм-дуьз вахт малум туш. Хуьруьн юкьвал куьгьне мискIиндин дарамат ала.
Татархан хуьруьн агьалияр вилик вахтара малдарвилел, багъманчивилел ва хуьруьн майишатдин маса хилерал машгъул хьана. Агьалияр, кеспи ийиз, маса шегьерризни физвай.
1886-йисан переписдин делилралди, Татархан хуьре 105 майишат ва 470 агьали (241 итим ва 229 дишегьли) авай.
1966-йисуз анин агьалияр ЦIийи Макьарал ва Герейханован совхоздиз куьч хьана.
Чи йикъара хуьре 35 майишат ава, 150-далай гзаф ксар яшамиш жезва. Хуьр Уллу-Гъетягърин администрациядик акатзава.
Мурад Мегьамедкеримован «СтIал Сулейманан район: тарихдин гелерай» ктабдай.
