Кхьейдакай мад сеферда
Гьуьрметлу редакция! Алай йисан 31-июлдиз акъатай «Лезги газетдин» 28-нумрада муьгъверганвийрин месэладикай макъала чап авунай сагърай!
Самур вацIай муьгъверганвийрин усадьбайриз яд гун патал насосдин станция кардик квай гьар са сятда 400 кв-лай артух ток харж жезва. Сезондин вахтунда (1-апрелдилай 1-октябрдалди) гьар суткада насосдин станцияди 5-5 сятда кIвалахайтIа ва гьар са сятда 400 кв кьван ток харж жез хьайитIа, 5200 кв кьван ток серф жезва.
Насосдин станция кардик кваз хуьн патал акъатзавай харж агалун патал ара-ара хуьруьн кьилини жемятдивай са-са агъзур манат пул кIватIзаватIани, муьгъверганвияр гьукуматдин вилик буржунин чилина гьатнава. И карди Муьгъверганрин хуьруьн къубуда гьафтеда 5 юкъуз вад-вад сятда яд хьуниз манийвалзава.
Гьуьрметлу редакция, чна квевай муьгъверганвийрин и хци месэла гьялунин карда куьмек тIалабзава.
Абдулашим Гьажимурадов
__________________________
Редакциядин патай
Гьуьрметлу Абдулашим Гьажимурадов! Гьялна кIанзавай месэлаяр авачир район, хуьр бажагьат ава. Вири жемятдиз талукь крар кьилиз акъудун тайин тир райондин, хуьруьн администрацийрин кьилевайбурун везифа я. Гьелбетда, «Лезги газетдин» редакцияди квелай атанвай чарарин бинедаллаз талукь идарайриз чарар-цIарар рекье твада. Гьа са вахтунда куьнни, Муьгъверганрин хуьруьн администрация, жемят и кардин къайгъуда хьун герек я. Чна квез, куьне къарагъарнавай месэладин гьакъиндай кьилдин чар кхьена, хуьруьнвийрин къуларни эцигна, жемятдин тIварцIихъай талукь идарайриз рекье тун меслятзава. Ша санал гьялин и месэла.
