9-сентябрдиз Дагъустандин Кьил Сергей Меликован регьбервилик кваз Каспий гьуьлуьн къерехда эцигзавай чIехи курортдин къурулуш арадал гъунин месэлайриз талукьарнавай совещание кьиле фена. Мярекатда «Кавказ.РФ» корпорациядин генеральный директор Андрей Юмшанова, республикадин са жерге министерствойринни муниципалитетрин кьилери иштиракна.
Гуьруьшдал чилинни эменнидин алакъайрин, объектар целди таъминарунин ва улакьар элячIна фидай рехъ туькIуьруниз талукь месэлаяр веревирдна.
«Федеральный «Пять морей и озеро Байкал» проектдин сергьятра аваз, уьлкведин Президентди ганвай тапшуругърихъ галаз алакъалу икьрарар чаз жавабдарвал авачирбурун гъиле твадай ихтияр авач. Каспийдин къерехдин кластер Президентдин программа я. Ада санлай Кеферпатан Кавказдин округ ва кьилди Дагъустан вилик фидай мумкинвилер гузва. Андрей Юмшановахъ ва РФ-дин экономикадин рекьяй вилик финин министерстводин векилрихъ галаз санал кIвалахзавайвиляй чалай хъсан нетижаяр къазанмишиз алакьнава», — къейдна С. Меликова.
А.Юмшанован гафаралди, проектдихъ галаз алакъалу суалар саки гьялна акьалтIарнава. Мукьвара инфраструктурадин объектар эцигиз эгечIдайвал я.
Къейд ийин хьи, Каспийскдин къерехдин кластер Дербент, Къарабудахкент, Къаякент ва Мегьарамдхуьруьн районрин мулкарал эцигзава. Адан умуми майданди 228 гектар тешкилда. Проект кьилиз акъудунин сергьятра аваз, «Манас-Махачкъала-Дербент» шегьре рехъ цIийикIа туькIуьр хъийизва. Алай вахтунда кластердин мулкарал мугьманханаяр, спа-комплексар, аппартаментар ва машгъулардай центраяр эцигдай инвесторрихъ галаз 17 икьрар кутIуннава.
Гегьеншдиз РД-дин Кьилин сайтдай кIелиз жеда.
Агьмед Магьмудов
