Къуьрерикай итижлу делилар

.  Антарктидадилай гъейри, амай вири континентра къуьрер яшамиш жезва.

.  Къуьрер анжах векь недай гьайванар яз гьисабзавай фикир малум ятIани, гьакъикъатда абуру якни незва.

.  Къуьрер яшамиш жезвай гьар сана абур гъуьрчен объектар я. Гьар камуна хаталувал гьалтзавай гьайванар ятIани, абур терг жезвайбурун сиягьда авач.

.  Къуьрер хаталувиликай хуьзвай «яракь» катун я. Абурувай са сятда 70 километрдин мензилдиз чукуриз жеда.

.  Тик чкадай тадиз эвичIунин чарасузвал аваз хьайитIа, къуьрери чеб, туп хьиз кIватIна, авадарда.

.  Къуьрерин сарар гьамиша еке жезва. Гьавиляй сарар куьруь авун патал абуруз векъи затIар жакьун герек жезва.

.  Къуьрери 3 метрдин деринвал авай тIеквенар эгъуьнзава. Яшамиш хьун патал туькIуьрзавай ихьтин чкайриз фидай ва анрай эхкъечIдай са шумуд чка жезва. Идалайни гъейри, ана ем недай, ксудай ва шапIаяр жедай кьилдин чкаяр тайи­нарзава.

.  Марф къвадайла, яд тефин патал къуьрери япар агажарзава. Эгер къайи яд япариз фейитIа, къуьр гьасятда начагъ жеда.

.  ТIебиатда къуьрер 5 йисуз кьван яшамиш жезва. Бязи чешмейри тестикьарзавайвал, чпин жуьрейрилай аслу яз, къуьрери 10 ва адалай гзаф йисара уьмуьр давамарзавай дуьшуьшарни ава.

.  Къуьрерин 30 жуьре малум я.

«Лезги газет»