1-сентябрдилай Россияда мигалкаяр алай машинриз рехъ тагунай къвезвай жермедин кьадар 7,5 агъзур манатдилай 10 агъзур манатдал кьван жеда ва я ахьтин водителар ругуд вацралай са йисалди кьван муддатда ихтияррин шагьадатнамадикай магьрумда.
Госавтоинспекциядин къуллугъчийри рикIел хкизвайвал, мигалкаяр алай машинар къведайла, адетдин улакьар гвайбуру абуруз рехъ гун лазим я. Улакь муькуь патаз акъудун ва я рекьин къерехдихъ гьалун дуьз яз гьисабзава. Эгер мигалкаяр алай махсус улакь патав гвай полосадай азаддиз физватIа, адаз манийвал гана кIандач.
ЯхцIур ДТП
25-августдилай 31-августдалди Дагъустандин мулкара улакьрин 40 авария арадал атана. Идакай РД-дин МВД-дин Госавтоинспекцияди хабар гана. Малуматда къейдзавайвал, аварийрин нетижада 9 кас кьена ва 49 касдал жуьреба-жуьре хирер-кьацIар хьана. Бедендиз хасаратвилер хьайибурук 6 аялни ква. Рекьерал чIуру гьалар арадал атунин себеб машинар гьалзавайбуру къайдайрал амал тавун я.
«Лезги газет»
