МФЦ-да гила цIийи къуллугъ кьилиз акъудзава — кредитрал ва микрозаемрал жува къадагъа эцигун. Жуван кIвачихъ кредит къачунал къадагъа эцигунин арза вугун патал МФЦ-диз хсуси паспорт гваз фин бес жеда. Арзадиз кIвалахдин 1-3 йикъан муддатда килигда ва кредитдал къадагъа эцигнавайвилин гьакъиндай малуматар «Госкъуллугъар» порталдин хсуси кабинетда пайда жеда.
И цIийивал арадал гъунин макьсад агьалияр лутувилин гьерекатрикай хуьн я. Жува эцигзавай къадагъа анжах потребительский цIийи кредитриз, микрозаемриз талукь я, ам ипотекадиз, автокредитдиз, чирвилер къачунай гьакъи гуниз талукь кредитриз талукь жезвач.
Инвалидри улакьар акъвазардай чкаяр
Инвалидриз талукь махсус чкайрал I ва II группайрин инвалидвал авай агьалийриз, четиндиз юзаз жезвай III группадин инвалидриз, гьакIни абур улакьра аваз тухузвай мукьва-кьилийриз машинар акъвазардай ихтияр ава.
Ихьтин чкайрал улакь гьавая акъвазардай ихтияр инвалидриз талукь федеральный реестрда къалурнавай улакьдин гьакъиндай малуматри тестикьарзава. МФЦ-дин пешекарри къейдзавайвал, са касдивай инвалидриз талукь чкайрал гьавая машин акъвазардай ихтияр хьун патал винидихъ тIвар кьунвай реестрдиз анжах са машиндикай малуматар вугуз жезва.
Инвалидриз талукь федеральный реестрдиз улакьдикай цIийи арза вугайдалай кьулухъ эвелан улакь махсус чкайрал акъвазардай ихтияр амукьзавач. Автомобиль реестрдик кутунин арза «Госкъуллугъар» порталдин куьмекдалди ва я «Зи документар» центрадиз (МФЦ) фена, вугуз жеда.
«Лезги газет»
