Августдин эхирра Екатеринбургда боксдай Россиядин чемпионат акьалтIна. Дагъустандин хкянавай командадин боксёрри 10 медаль къазанмишна. Къизилдин медалриз Жамбулат Бижамов (80 кг-дал къведалди), Шарабутдин Атаев (86 кг-дал къведалди) ва Муслим Гьажимегьамедов (92 кг-дал къведалди) лайихлу хьана. Фадлай чи командадихъ тахьанвай ихьтин зурба агалкьун чемпионриз ва абурун тренерриз Дагъустандин Кьил Сергей Меликовани тебрикна.
И йикъара «Дагъустан» РИА-да кьиле фейи пресс-конференцияда Дагъустандин физический культурадин ва спортдин министрдин заместитель Гьайдарбег Гьайдарбегова, Дагъустандин боксдин федерациядин президент Тимур Ибрагьимова, РД-дин хкянавай командадин кьилин тренер Руслан Хаирова, уьлкведин чемпионри, гьакI абур гьазурай Россиядин лайихлу тренерар тир Рашидбег Агьмедова ва Солтан Мигьитинова, гимишдин медалдин сагьиб Расул Мегьамедова (63, 5 кг-дал къведалди) иштиракна. Анал, чемпионатдин нетижаяр хьиз, вилик квай турнирриз, санлай боксдин гележегдин планриз талукь месэлаярни веревирдна. Чемпионри ва призерди гележегдин планрикайни суьгьбетна.
Чи ватанэгьли, дуьньядин ва Европадин чемпионатрин буьруьнждин медалдин сагьиб, Олимпиададин къугъунра (2000 ва 2004-йисар) Азербайжандин хкянавай командадин член Руслан Хаирова къейд авурвал, Дагъустандин хкянавай командади, дугъриданни, еке имтигьан вахкана. ГьикI хьи, чип вегьиналди, чи боксёрриз, гьа сифтегьан бягьсерилай башламишна, уьлкведин викIегьбурухъ, спортдин чIалалди лагьайтIа, 1-нумрайрихъ галаз чпин гъутарин къуватар ахтармишун кьисмет хьана. МасакIа хьунни лазим туш, уьлкведин чемпионатди уьлкведа виридалайни къуватлу гъутарин сагьибар, виниз тир тежриба авайбур майдандиз акъудун герек я. Дагъустандин хкянавай командадик квай тежрибалу спортсменри и имтигьан агалкьунралди вахкана.
Малум хьайивал, уьлкведин чемпионатдин гъалибчийри ва призёрри алай йисан эхирра Арабрин Сад хьанвай Эмиратра кьиле фидай дуьньядин чемпионатда чпин гъутарин къуватар къалурда. Мукьвал тир гележегдин акъажунрикай лагьайтIа, абуру 15-сентябрдиз Каспийскда Али Алиеван тIварунихъ галай спортдин дараматда, Мегьамед-Салам Умаханован экуь къаматдиз бахшна, кьиле тухудай международный турнирда иштиракда.
Рагнеда Рамалданова
