Россиядин Федерациядин Гьукуматдин Председатель Михаил Ми­шус­тина нубатдин заседанидал малу­марайвал, дяведин махсус серенжем­да иштиракзавай ва 2022-йисан ок­тябр­дилай 2023-йисан сентябрдалди РФ-дин оборонадин министерст­водихъ галаз икьрар кутIунай ксарни женгерин гьерекатрин ветеранрик­ кутазва­. Идан гьакъиндай Гьукуматдиз уьл­кведин Президент Владимир­ Путина­ тапшуругъ ганай. Адан бине­даллаз­ РФ-дин Гьукуматди федеральный за­кондик дегишвилер кухтун патал чарар-цIарар гьазурнава. Пре­зидентди къейд авурвал, женгерин гьерекатрин ветеран лагьай тIвар дяведин махсус серенжемда женгер чIуг­вазвайбуруз гана кIанда.

Гьукуматдин Председателди мадни лагьайвал, винидихъ къалурна­вай­­ вахтара аскервилин партал алу­кIай­буру командиррин важиблу везифаяр тамамарна, душмандихъ галаз кьиле фейи женгера викIегьвал, жуьрэтлувал, дирибашвал къалурна. Са рахунни алачиз, абурув, гьакI набутар хьайибурувни чпиз къвезвай тIварар, галайвилер агакьда. Закондик кухтур ихьтин дегишвили аскеррин яшайиш хъсанарда.

*  *  *

Гьар са чкада уьлкведин итижар хуьзвай, Россиядин армияда къуллугъ­завай ксариз яшайишдин рекьяй куьмек гудай серенжемар Дагъустандани кьабулзава. РД-дин Гьукуматдин Председателдин заместитель Абдурагьман Магьмудова хабар гайивал, регионда армияда къуллугъзавайбуруз ва абурун хизанриз государстводин патай 26 жуьредин куьмекар гузва. Аскерар са сеферда гузвай 500 агъзур манатдалди таъминарзава. «Каспий» батальонда къуллугъзавайбуруз мадни кьилдин 300 агъзур манат гузва.

Шегьеррин ва районрин админис­трацийрин патайни аскеррив 100-300 агъзур манат агакьзава. Медицинадин 127 идаради дяведин махсус серенжемда иштиракзавайбур гьи вахтунда хьайитIани кьабулзава ва абуруз герек куьмек гузва. Медицинадин 20 идара реабилитациядин месэлайрал машгъул жезва.

«Дагъларин гьунар» программадин сергьятра аваз, дяведин махсус­ се­ренжемдин 35 иштиракчиди гос­уп­равленидин органра гележегда кIва­лахдай чка тайинарун патал тежрибадин тарсар къачузва. Гьа са вахтунда, дяведин махсус серенжемдай­ хтанвай 200-ев агакьна аскерар кIва­лахдалди таъминарнава. Хсуси бизнес ачухун, фермервилин майишатар кардик кутун, четин гьаларай экъе­чIун патал яша­йишдин 695 икьрар кутIуннава.  РД-дин Халкьдин Собранида СВО-дин иштиракчийрин ва ветеранрин крарин рекьяй махсус комитет арадал гъанва.

Аскеррин яшайишдин гьалар хъсанаруник «Вири санал ала» фондуни, жемиятдин «Дагълари рикIел хуьда» организацияди, государстводин «Ватан хуьзвайбур» фондунин Да­гъустандин филиалди ва мергьяматлувилин маса идарайрини чпин пай кутазва. Мадни лагьайтIа, СВО-дин иштиракчийриз чилин участокар чара ийизва, абур автомобилралди таъминарзава.

*  *  *

РД-дин зегьметдин ва яшайишдин рекьяй вилик финин министр Мегьамедзагьид Кихасуров Россиядин Игит Энвер Набиевахъ галаз гуьруьшмиш хьана. Ада и идарада, «Игитрин вахт» программадин сергьятра аваз, къуллугъдин жигьетдай вердишвилер къачузва.

Министрди гуьруьшдин вахтунда­ офицердиз ведомстводин кар алай хи­лерикай, регионда яшайишдин мес­­э­лаяр гьялун патал кьабулзавай­ се­ренжемрикай ихтилатна. Кье­тIен фикир дяведин махсус серенжемда­ иш­ти­­­ракзвай ксариз ва абурун хизанриз­ яшайишдин рекьяй куьмек таъми­н­а­ру­низ гузвайдакай, «Яшайишдин икь­рар» программадин сергьятра аваз, СВО-дин ветеранриз ва абурун хи­зан­риз ийизвай галайвилерикай лагьана.

Энвер Набиева аскеррин патай гзафни-гзаф гьихьтин арзаяр къвез­ва­тIа чирна. Гьа са вахтунда ада рес­публикада санани къейд тавуна­ кIвалахзавай агьалийрин кьадар тIи­ми­ларунин месэладиз итиж авуна. М. Кихасурова и жигьетдай министерст­води тухузвай кIвалахдикай ва кьабулзавай серенжемрикай гегьеншдиз суьгьбетна.

Чи мухбир