Россиядин Федерациядин Государстводин пайдахдин юкъуз Россиядин Игит Султан Сулейманович Сулейманован тIвар ЦIийи поселокдин умуми образованидин юкьван школадиз ва са куьчедиз гуниз талукьарнавай мярекат кьиле фена.
Пакаман кьиляй махлукьаат школадин гьаятдиз ахмиш жезва. Анаг Россиядин, Дагъустандин пайдахрив безетмишнава. Пайдахар гьаятда линейкада акъвазнавай школьникрив, волонтерривни гва.
Мярекат кьиле тухузвай ЦIийи поселокдин юкьван школадин муаллим Заира Селягьовади митингда райондин кьил Саид Темирханова, адан 1-заместитель Заур Къагьриманова. СтIал Сулейманан ва Кьурагь районрин военный комиссар Райзудин Женетова, райондин Общественный палатадин председатель Алимет Мейланов, Россиядин Игит Султан Сулейманован буба Сулейман Султангьамидовича, райондин ветеранрин Советдин председатель Ислеман Ризаева ва «Память гор» тешкилатдин векил Артур Хасметова иштиракзавайдакай малумарна. Райондин кьил Саид Темирханова мугьманар, иштиракчияр тебрикна:
— ЦIийи поселокдин юкьван школа районда чIехибурукай, гьар са рекьяй хъсанбурукай сад я, — лагьана Саид Темирханова. — Завай инанмишвилелди лугьуз жеда хьи, школада халис ватанпересар гьазурзава. И кар, школа акьалтIарна, СВО-да чпин аскервилин буржи тамамардайла, орденризни медалриз лайихлу хьайи, Ватан патал чпин чанар къурбанд авур кьегьалриз мектебдин цларал алай мемориалдин кьуларини тестикьарзава. Гьа кьегьалрикай сад Россиядин Игит Султан Сулеймановни я. Игит хва Султанан диде-бубадиз чна мад сеферда аферин, баркалла лугьузва. Чи мурад СВО фад куьтягь хьун ва адан иштиракчияр гъалибвал гваз хтун я.
Школадин 9-классдин ученица Амина Малабаевади ватанпересвилин «Алудмир куь рикIелай» шиир кIелна.
Заира Селягьовади къейд авурвал, инсан телеф хьуникай рахун гьамиша залан я, рикIиз тIар жеда, лап жегьил инсан телеф хьуникай рахун мадни залан я. Къе чна, чи школада кIелай Султан Сулейманов рикIел хкун яз, кьил агъуззава. Адан анжах 27 йис тир. Подполковникдин чин адаз телеф жедалди са тIимил вахт вилик ганвай. Вичин къуллугъдин везифаяр тамамардайла, ам 2024-йисан 20-ноябрдиз телеф хьана.
СВО-да сифте йикъарилай иштиракзавай С. Сулеймановахъ «Жуьрэтлувиляй» пуд, «За заслуги перед Отечеством 2 степени» орденарни са шумуд медаль авай.
Военный комиссар Райзудин Женетова райондин агьалийри СВО-да къалурзавай кьегьалвилерал, кьилди Россиядин Игит Султан Сулейманован къуллугъдин рекьел гегьеншдиз акъвазна. 1997-йисан 28-июлдиз дидедиз хьайи Султан Сулейманова школадилай гуьгъуьниз Москвада Суворован тIварунихъ галай Высший военный командный училище акьалтIарна, Южно-Сахалинскда Россиядин Яракьлу Къуватрин военный частуна къуллугъна. СВО башламиш хьайи сифте йикъалай ада ЛНР-да ва ДНР-да гвардиядин 39 — кьилдин мотострелковый бригадада гьужумдин батальондиз регьбервал гана… Аферин, баркалла Султан хьтин кьегьал хва тербияламишунай диде-бубадиз, школадин муаллимрин коллективдиз!
Султан Сулейманован классдин руководитель Нарида Мукаиловади, вилерал накъвар акьалтна, лагьана:
— Заз гилани агъаз кIанзавач зи ученик Султан амач лагьана. Низам, ахлакь авай жегьил тир.
И арада зи рикIел РД-дин Кьил Сергей Меликова лагьай гафар хтана: «Диде-бубаярни муаллимар инсан арадиз атунин карда важиблу роль къугъвазвай асул кьве къуват я…»
Мярекатдал Султан Сулейманован экуь къамат ими Фикрет Сулеймановани рикIел хкана.
Рахунрилай гуьгъуьниз Саид Темирханова ва Россиядин Игитдин буба Сулейман Сулейманова школадин цлал алкIурнавай Султан Сулейманован мемориалдин кьул ачухна.
Мярекатдин иштиракчийри мемориалдин кьулунин кIаник столдал цуьквер эцигна.
Гьа и юкъуз Сулеймановрин хизан яшамиш жезвай ЦIийи поселокдин са куьчедиз Россиядин Игит Султан Сулейманован тIвар гана, кIвалерихъ галай къванцин са цлал мемориалдин кьул ачухна.
Саид Темирханова хабар гайивал, Россиядин Игит Султан Сулейманован тIвар Ахцегь райондин Цуругърин хуьруьн школадизни гузва.
Мярекатдал гьакIни райондин общественный палатадин председатель Алимет Мейланов, Донбассда кьиле физвай военный махсус серенжемдин иштиракчи Фарман Шамсудинов ва масабурни рахана. Россиядин Игитдин кьегьалвилер къейд авунихъ галаз санал абуру СВО-дин къурбандрин тIварар эбеди авунай, абурун хизанрин гьакъиндай ийизвай къайгъударвиляй райондин кьиле авайбуруз сагърай лагьана.
Хазран Кьасумов
