Дербент шегьерда «Яшамиш хьун па­тал чна рикIел хуьзва» лишандик­ кваз ватанпересвилин форум хьана. Мярекат Дагъустан­дин Кьил Сергей Меликова къуьн кутуналди «Ал рангунин елкенар» комплексда кьиле фена.

Ана Россиядин Афгъанистандин­ ветеранрин Союздин ДРО-дин председатель Мегьамед Хадулаева, Дербент шегьердин кьилин заместитель­ Видади Зейналова, Дагъустандин Кьилин патав гвай гражданвилин жемият ва инсанрин ихтия­рар вилик ту­хузвай Советдин член Светлана Гьамзатовади, женгерин гье­рекатрин ветеранри, Дербент ­ше­гьердин жегьилрин парламентдин векилри ва масабуру иштиракна.

Мярекатдин иштиракчияр тебрик­ авуналди, В. Зейналова лагьана: «Гьуьр­­­метлу дустар! Къадим Дербент­ядин чилел за квез шегьердин­ кьилин ва жуван патай куьн атуй, рагъ атуй лугьузва. И гуьруьш Дербентда кьиле тухунай форумдин тешкилатчи Ш. Хадулаев сагърай. За квез сагъвал, ислягьвал ва гележегдихъ инанмишвал хьун алхишзава».

Форумдин кьилин макьсад тарих ри­кIел хуьн ва чирун, жегьилриз гражданвилин активлу позиция арадал гъун я. ГьакIни гражданвилин къанажагъ­ арадал гъунин, ватанпересвилин­ тербия гунин, алай аямдин технологи­яр иш­лемишунин карда жегьилрин теш­ки­латрин роль кьетIенди тирди къейдна.

Форумдин иштиракчийри тарих рикIел хуьниз ва ватанпересвилин тербия гуниз талукьарнавай докладар авуна. Абуру чпин рахунра халкьди рикIера хуьнин важиблувал гележегдин диб тирди къейдна.

Къагьриман Ибрагьимов