2-сентябрдиз Дагъустандин Кьил Сергей Меликова Махачкъалада республикада авай хци месэлаяр гьялуниз талукьарнавай совещание кьиле тухвана. Ана РД-дин Кьилин ва Гьукуматдин Администрациядин, РД-дин Халкьдин Собранидин векилри, региондин министерствойринни ведомствойрин кьилери иштиракна.
Адан сергьятра аваз, республикадин Кьили РД-дин милли сиясатдин ва динрин крарин рекьяй министр яз Темирлан Абуталимов, Къизилюрт шегьердин администрациядин кьиле — Саид Маматханов ва РД-дин государстводин яшайишдин инспекциядин регьбер яз Арсен Гьажиев тайинарунин гьакъиндай баянар гана.
ГьакIни совещанидал Сергей Меликова гьукумдин жавабдар органрин векилриз тIебиатдин «Вини Гуниб» паркунин мулкара къанунсуздаказ кьиле физвай эцигунрай кьил акъудун, республикадин тамун мулкарик цIай акатнавай районра цIай хкадарунин жигьетдай алава серенжемар кьабулун тапшурмишна. Идалай гъейри, совещанидин иштиракчийри и вацра кьиле фидай сечкийриз гьазурвилер акунин месэлаярни веревирдна.
Гегьеншдиз РД-дин Кьилин сайтдай кIелиз жеда.
Чи мухбир
