Дагъустандин Гьукуматдин Председатель Абдулмуслим Абдулмуслимо­ва саласа юкъуз совещание кьиле тухвана. Анал республикадин медици­на­дин кредитрин буржар алай идарайрикай ва абур алудун патал кьабулзавай серенжемрикай ихтилат фена.

Республикадин премьер-министрди къейд авурвал, медицинадин буржар алай идарайрин месэла са шумуд сеферда винел акъудайди я. Гьайиф хьи, са бязи медидарайри герек серенжемар кьабулзаватIани, гьалар хъсан патахъ дегиш жезвач.

«Здравоохраненидин идараяр финансралди таъминарун ва абурун кIва­лах планламишун гьар йикъан месэлайрик акатзава. ИкI, 2025-йисан 1-августдин делилралди, медицинадин идарайрал алай буржари 800 млн манат тешкилзава. Алай вахтунда буржара гьатнавай 12 медидара ава. Бязибурал алай буржар йисалай-суз гзафни жезва.

За гьисабзавайвал, здравоохраненидин госидарайриз чара ийизвай бюджетдин пулар менфятлувилелди ишлемишун абуруз регьбервал гузвай ксарилай, анра кIвалах тешкилзавай гьалдилай аслу я. Гьа са вахтунда и кардиз кьецI гузвай ва медицинадин идараяр буржуна гьатзавай маса крарни хьун мумкин я. Абурун вилик падни кьаз жезвай хьтинди туш. Гьавиляй заз къе и мярекатдал док­ладчидивайни, идарайрин кьилин духтурривайни гележегда буржар алудун патал гьихьтин серенжемар кьабулзаватIа, чир хьана кIанзава»,- лагьана Гьукуматдин Председателди.

«Медицинадин идарайрал алай буржарикай азад тахьунин четинвал ам я хьи, налогрин органри лицевой счет­рай пуларихъ галаз алакъалу операцияр авунал къадагъа эцигнава. ОМС-дай чара ийизвай такьатар ишлемишдайла, буржар арадал атунин са шумуд себеб ава. Мисал яз, иллаки районрин медицинадин идарайри медицинадин рекьяй ийизвай къуллугъриз талукь умуми лишанар кьилиз акъудзавач. Идарайрин гуьзчивилик квай инсанрин кьадар тIимил жезватIани, медперсоналдин штат авайвал тазва»,- лагьана РД-дин здравоохраненидин министр Я. Глазова.

Кьабулзавай серенжемрикай ихтилат кватайла, Я. Глазова хабар гана хьи, РД-дин здравоохраненидин министерствода хсуси приказдалди буржар алудунин месэладиз талукь комиссия кардик кутунва. Ада буржар алуддай жуьреба-жуьре рекьер жагъурзава. Комиссиядин членар Избербашдин, Дахадаев, Дербент, Бабаюрт, Къаякент, Гумбет районрин центральный больницайриз фена.

Кьабулай серенжемар себеб яз, алай йисан 1-августдалди буржарин кьадар 9 процентдин тIимиларна. ИкI, 2025-йисан­ 1-январдиз буржунин кьадар 969,9 млн манат тир. Къе ада 884,9 млн манат тешкилзава.

РД-дин Гьукумат­дин Председателди больницайрин кьилин духтурривай буржарин кьадар тIи­ми­лардай серенжемар кьабулун лап кIе­вивилелди истемишна. Ада идарайра кIвалахзавайбурун кьадар гзафа­рун, гьакъикъатда авачир инсанар кIвалах­далди таъминарун хьтин крариз рехъ тагунал фикир желбна.

«Медицинадин са идара ахтармишайла, малум хьана хьи, ана медицинадин работникрилай административный персонал гзаф тир. Секретарар, куьмекчияр, IТ-пешекарар, бухгалтерар, финансистар, экономистар, информациядихъ галаз алакъалу пешекарар, технический работникар, экономикадин ва маса месэлайрай кьилин духтурдин замес­тителар… Абур патал куьне штатарни тайинарзава. Чун гъавурда ава, вучиз куьне акI ийизвайди ятIа. Ихьтин крарал эхир эциг. Садалайни аслу хьун ва абурун тIалабунарни кьилиз акъудун герек авач. Куь кьилин везифа медицинадин идарадив менфятлувилелди кIвалахиз тун ва агьалийриз медицинадин рекьяй ерилу къуллугъ авун я», — лагьана Абдулмуслим Абдулмуслимова.

Здравоохраненидин хилел гуьзчивалзавай вице-премьер Абдурагьман Магьмудова алава хъувурвал, медици­надин са идарадин штатда «менюдин рекьяй бухгалтер» къуллугъни авай. Ада РД-дин Гьукуматдин Председателдиз­ ме­дицинадин идарайрин регьберриз чпе­лай буржар алуддай вахтар тайинарун­ ва, везифа кьилиз акъуд тавуртIа, къуллугъдин рекьяй месэла гьялун теклифна­.

Здравоохраненидин хилел гуьзчивалзавай Федеральный къуллугъдин терри­ториальный органдин регьбер Тамирлан­ Мухамедова медицинадин идарайрин ма­жибрикай ихтилат кудна. Ада лагьайвал, медицинадин са идарадин экономист­рин мажибар духтурринбурулай екебур тир.

Совещанидал Бабаюрт, Гуниб, Дербент, Избербаш, Рутул, Гумбет, Дахадаев районрин ва Дагъустандин Огни ше­гьердин больницайрин кьилин духтур­рихъ яб акална. Вичел алай буржар алуд­­завай идарадик анжах Бежтадин учас­токдин больница акатзава.

Хийир  Эмиров